Accessibility links

Кайнар хәбәр

Qazanğa Alinä Kabaeva kilde


18 noyäber könne Tatarstanda Äzerbäycan respublikasınıñ Rusiädäge wäqälätle wäkile Rämiz Rizaev buldı. Anıñ vizitınıñ maqsatı – Tatarstan belän Äzerbäycan arasında ike yaqlı xezmättäşlekne arttıru, iqtisadi häm mädäni bağlanışlarnı üsterü. Rämiz Rizaev Säwdä ministrlığı, Qazan şähäre xakimiäte wäkilläre belän oçraşıp söyläşte, dip xäbär itte İntertat.ru gäcite. Ä Tatarstannıñ Säwdä ministrı Xafiz Salixov isä bu könnärdä Deli şähärendä uza torğan Rusiä-İndiä xökümätara komissiäseneñ utırışında qatnaşa. İndiä Respublikanıñ deputatları 18 noyäberdä Däwlät Şurası Prezidiumınıñ çirattağı utırışına cıyıldı. Tatarstan prezidentı Mintimer Şäymiev isä pänceşämbe könne cirle üzidarä mäs’äläsenä bağışlanğan kiñäşmä ütkärde. Şul uq könne ul sport yoldızların da qabul itte. Qazan kremlenä bu yulı tanılğan sportçı, Olimpiada uyını häm küpsanlı dönya, Evropa çempionı Alinä Kabaeva, anıñ komanda buyınça iptäşe Läysän Ütäşeva, Ol’ga Kapranova häm näfis gimnastika buyınça bilgele trener İrina Viner çaqırılğan ide. Älege gimnastlar Qazanda şuşı könnärdä ütä torğan Yoldız dip isemlängän näfis gimnastika buyınça V xalıqara turnirnıñ açılışında qatnaşırğa kilgännär. Berniçä tatar kongressına, tatar yäşläre cıyınına çaqırılıp ta kilmägän Alinä Kabaeva bu yulı Qazanğa kilergä niät itkän.

Qazanda 18 noyäber könne dä däwlät universitetınıñ 200 yıllığı uñayınnan bäyräm çaraları däwam itte. Bu könne dä berniçä oçraşu, cıyılış, tantanalar ütte. Alar arasında bilgele rus şağire Evgeniy Yevtuşenkonıñ uquçılar belän oçraşuın bilgeläp ütep bula. Şunısın da äytergä kiräk, Yevtuşenko Qazan universitet dip isemlängän poema avtorı. Şağirneñ tatarstanlılar belän aralaşuı berençe genä tügel. Läkin bu yulı da şiğriätne söyüçe qazanlılar oçraşuda şaqtıy ide. Ä menä bäyräm uñayınnan çärşämbedä uzğan tantanalı kiçä xalıqnıñ qızıqsınuın ällä ni uyatmağan bulsa kiräk. Kiçädä qatnaşuçılar süzlärenä qarağanda, zur qunaqlar qatnaşlığında ütkän räsmi çara häm konsert uzğan zal tulı bulmağan. Axırğa taba tamaşaçılar sanı tağı da kimegän. Şulay itep, ällä keşelär Qazan däwlät universitetında ozaqqa suzılğan bäyräm çaralarınnan arığannar, ällä bu uqu yortınıñ bäyrämen äzerläwçelär eşläp betermägännär, läkin küpsanlı qunaqlar qatnaşlığındağı tantanalı çara yarım buş zalda uzğan.

Qazan milli-mädäni üzägendä pänceşämbe könne Tatar şlyaxı digän dokumental’ fil’m kürsätelde. Yäş Qazan rejisserı Al’bert Şakirov töşergän älege lenta Pol’şa tatarlarınıñ tormışı xaqında. Anda yıraqtaşı millättäşlärebezneñ XIV ğasırdan başlap xäzerge köngä qädär tarixları, mädäniäte, ğöref-ğädätläre kürsätelä. Bu fil’m Mäskäwdäge İslam dönyası televideokompaniäsendä töşerelgän, dip yaza Tatar.ru säxifäse.

Gölnaz İlgizär

XS
SM
MD
LG