Accessibility links

сишәмбе, 6 декабрь 2016, Казан вакыты 11:11

“Bas qızım Äpipä” Kremldä!


Mäskäwdä, Kreml'neñ syezdlar sarayında tarixta berençe märtäbä, tatarnıñ iyülle cırlarınnan berse “Bas qızım Äpipä” cırı yañğıradı. 16nçı noyäberdä 6 meñ tamaşaçı cıyılğan syezdlar sarayında Rusiäneñ xalıq artistı Renat İbrahimov konsertı ütte. Renat İbrahimovnıñ konsert programmasında rus cırları küpçelek bulsa da tatar cırları da baytaq qına yañğıradı. Şulay uq tamaşaçı Renat İbrahimov başqaruında ingliz, ukrain, italian tellärendä başqarılğan cırlarnı alqışlap qarşı aldı. Kreml'neñ syezdlar sarayındağı bu konsert Renatnıñ 30 yıllıq icatına bağışlanğan ide. Şuña kürä anı Rusiäneñ bik tanılğan cırçıları, kompozitorları da qotladı. Ä inde Mäskäw merı Yuri Lujkovtan kilgän qotlaw telegrammasınnan säxnädän uqıp işetterdelär. Renat üze dä cıyılğan tamaşaçılarnı Ramazan bäyräme belän qotladı. Annan soñ zalda tatarlar barmı dip soradı da, köçle kül çabulardan soñ Bas qızım Äpipä digän cırnı başqardı.Tatınlğan cırçı Yosif Kobzonnıñ kilüe Renat öçen dä kötelmägän buldı didelär. Zur çäçkä bäyläme belän säxnägä çıqqan Yosif Kobzon Renatnı icadi yubileyı belän qotlağannan soñ, Renat möselman, min yähüdi, ikebezneñ dä tawışı bariton, läkin bez icat yulında berqayçan da ber-berebez belän tartışmadıq, bere-berebezne xörmät ittek dide. Häm bezneñ mönäsäbätlärne İzrail belän Palestina ürnäk itep alırlıq dip, şayartıp ta quydı. Renat İbrahimovnı qotlarğa ul könne Kreml'neñ syezdlar sarayına tanılğan kompozitor Aleksandra Paxmutova da kilgän ide. Ul, Renat üzeneñ cırçı bularaq alğan berençe urının minem cırımnı başqarıp alğan ide. Bez utız yıl buyı anıñ belän xezmättäşlektä dide. Şulay uq Renatnı bu icadi yubilee belän tanılğan cırçı Valentina Tolkunova da qotladı. Konsert Ovsyannikov citäkçelegendä prezident orkestrı uynawında bardı. Konsertta şulay küp kenä estrada törkemnäre qatnaştı Şunısı da qızıqlı buldı Mäskäwneñ balalar myuzikxollı digän törkemdä Renatnıñ cide yäşclek ulı Soltan da şöğillänä ikän. Ul da bu konsertta çığış yasadı. Renat İbrahimov başqaruında Äniemä digän cırnı tamaşaçı köçle alqışlarğa kümep qarşıladı. Ul könne alqışlar küp buldı. Renat İbrahimov başqaruında rus cırlarınıñ klassikasına äwerelgän suğış yıllarında yazılğan cırlar da yañğıradı. Ul cırlarnı Renat xärbi kiemdä başqardı. Konsertta şulay Renat Ibrahimovnıñ cır teatrı artistları belän berlektä tanılğan cırçı Tamara Gversiteli dä cırladı.

Şunısın da äytergä kiräk, Kreml'gä xalıqnı metall ezläwçe caylanmalar aşa, här keşene tikşerep kertkängä kertkängä, konsert beraz soñarıp başlandı. Häm tänäfessez ütte. Koncert programmasın ğäcäyep cılı yazılğan ssenariy nigezendä, Renat İbrahimovnıñ cır teatrında eşläwçe Qazan qızı Venera Siracieva alıp bardı.

Näzifä Kärimova, Azatlıq radiosı, Mäskäw

XS
SM
MD
LG