Accessibility links

җомга, 9 декабрь 2016, Казан вакыты 13:01

Ramazan ayınıñ soñğı könnärendä Tomskida Qor`än uqu buyınça bäyge bulıp uzdı


Ramazan ayınıñ soñğı könnärendä Tomskida Qor`än uqu buyınça bäyge bulıp uzdı. Mondıy yarışlar Tomskida inde öçençe märtäbä oyıştırıla. Aldağı ikese ölkä külämendä ütkärelgän bulsa, bıyılğısı töbäqäräğa äylänep, anda Kemerovo häm Novosibirski ölkälärennän dä qatnaşuçılar buldı. Şunısı da ähämiätle, bu dini bäygelär balalar häm yäşlär arasında ütkärelä, häm anda 5 yäşlek nänilärdän başlap, 25 yäşkäçä bulğan yegetlär häm qızlar qatnaşa. Yäş buyınça alar 4 törkemgä bülenep yarışalar. Qatnaşuçılarnıñ dini belemnären häm Qor`än uqu ostalıqların, sostavında Qızıl häm Aq mäçetlär imamnarı, ğäräp häm tatar telläre uqıtuçıları, tatar mädäniät üzäge direktorı bulğan märtäbäle jyuri bäyäli. Bäygeneñ töp oyıştıruçısı bıyıl da, başqa yıllardağı kebek, ölkä tatar mädäniät üzäge buldı häm ul uzğannarı kebek ük Kärimbay yortında ütte. Bıyılğı konkursnıñ şundıy üzençälege dä buldı – anda tatar balaları ğına tügel, rus, üzbäk, tacik, qazaq, qırğız häm başqa möselman ömmätennän bulğan balalar häm yäşlär qatnaştı.

Bäyge ütkärelgän könne irtän-irtük tübätäylär kigän yegetlär, aq yawlıqlar bäylägän häm ütä dulqınlanğan qızlar Kärimbay yortında cıyıldılar. Bäyge Qor'än sürälären uqudan başlanıp kitte. Soñınnan islam nigezläre buyınça sorawlar birelde. Yarış qararğa küp kenä tamaşaçı da kilgän ide. Şunısı da kürkäm buldı, qatnaşuçılarnıñ Qor`än sürälären uquların, sorawlarğa cawaplar birülären alar ruxlanıp tıñladılar, xätta yözläre dä yaqtırıp kitkän kebek toyıldı. Axırda ğäräp tele möğallime Äbdeliläx Zäxar äfände tamaşaçılar arasında da konkurs ütkärde, alarnıñ ni däräcädä islam dine nigezlären belülären tikşerde. Äytergä kiräk, qatnaşuçılar ğına tügel, tamaşaçılar din qanunnarın yaxşı belülären kürsättelär. Älbättä aktiv cawaplar birüçelärgä istälekle büläklär tapşırıldı.

Konkursnıñ näticälärenä kilgändä, ğädättägeçä här nominatsiä buyınça ciñüçelär bilgelände. Alarğa Qor`än kitabı, yefäk şarflar, çikkän tübätäylär, şämäillär, mäçet räweşendä eşlängän şämdällär kebek büläklär birelde. Şunı da assızıqlarğa kiräk, törle nominatsiälärdä 1nçe urınnarnı Tomskilılar - Timur Sitnikov, Alisä Berdieva, Abusäyet Cumaev, İldar İzmaylov yawladılar. Küräseñ biredä dini tärbiägä iğtibar küp birelä. Döres, qayber qunaqlar da yaxşı ğına näticälär kürsättelär - Anjero-Sudjenskidan Räşit Möcbatullin häm Novosibirskidan Ruslan Fetqullin öçençe urınnarğa layıq buldılar.

Äytergä kiräk, oyıştıruçılar da, qatnaşuçılar da dini bäygedän qänäğät qaldılar. Mondıy çara berençe yaqtan yäş buınnıñ din belän qızıqsınuın, dingä tartıluın arttırsa, ikençe yaqtan islam dineneñ tatulıqqa, berdämlekkä, tınıçlıqqa öndäwçe din ikänlegen tağı ber qat assızıqladı,- didelär alar.

Sayganova, Omski

XS
SM
MD
LG