Accessibility links

якшәмбе, 11 декабрь 2016, Казан вакыты 05:12

Yuğarı Pışma mäçetendä yaña imam


Bu könnärdä Milli Media-Xolding citäkçeläre Yuğarı Pışma şähäre mäçetenä küptän tügel imam bulıp eşkä kilgän Ayrat xäzrät Möxämmätcanov belän oçraştılar.

Sverdlaw ölkäsendä genä tügel, böten Rusiädä dä iñ matur mäçetlärneñ berse bulıp sanalğan Baqır mäçete, yegerme meñnän artıq möselman xalqı yäşägän zur şähärdä, qızğanıçqa qarşı, moña qädär küp itep xalıqnı cıya almadı. Monıñ säbäben mäçettä eşlägän din ähellärennän kürergä bula, älbättä. Mähabät zur mäçetne tözep ayaqqa bastırğan Ural taw-metallurgiä kompaniäse citäkçeläre, bu eş belän kileşä almıyça, Qazan şähärennän bik uqımışlı, bik belemle imam çaqırtıp kiterdelär.



Yaña imamnıñ yaña cirdäge eşe Ramazan şärif ayında başlana. Ayrat xäzrät xalıqnı qızıqsındıru, yañaça itep eşli başlaw niäte belän Qazannan, islam universitetınnan Qor’än kärimne yattan belüçe şäkert çaqırtıp kitergän. Kön sayın täräwix namazları waqıtında yegermeşär bit qor’än uqıp, 30 kön urazada 600 bitlek Qor’än kärimne uqıp çıqqannar. Taw-metallurgiä kombinatı citäkçeläre täräwix namazlarınnan soñ kön sayın möselmannarnı öylärenä qaytaru öçen avtobus bilgelägännär. Mäçettä kümäk iftar mäclesläre oyıştırıla başlağan. Ayrat xäzrät äytüençä, iñ berençe iftar mäclesen ber çınayaq çäy belän ber sınıq ipidän başlap kitkännär. İkençe könnän başlap, möselmannar 40-50 keşelek itep mul iftar öställäre äzerli başlağannar. Mondıy mäcleslär alarnı tağın da yaqınaytqan, berläştergän.

Bu eşlärneñ näticäse şunda uq kürengän: yaña imam kilep eşli başlawğa ber ay da ütmästän, mäçetkä yörüçelärneñ sanı 50-60 qa citkän. Uraza ayında kilgän fitır sädäqasın da Ayrat xäzrät bik ğädel itep urnaştıru yulın tapqan. Şähärdäge yätim balalar öçen bulğan priyutqa barıp, tärbiäçelärdän sabıylarğa iñ kiräk bulğan äyberlärne beleşkän. Annan soñ bazardan priyuttağı 29 balanıñ härbersenä dä qışqı cılı kiemnär alğannar. Älege büläklärne här balanıñ üz qulına tapşırıp, sabıylarnıñ küñelen söyendergännär.

Ayrat xäzrät äytüençä, islamnıñ sotsial' programmasın ütäw niäte belän sabıy balalarğa yärdäm itep toru mäçet başqaraçaq eşlärneñ töp yünäleşläreneñ berse bulıp toraçaq. Ğomumän, anıñ fikerençä, dini oyışmalar, milli-ictimaği oyışmalar belän berlektä cämğiätneñ küp kenä sotsial' problemaların çişüdä xäldän kilgänçä qatnaşırğa tieş.

Yuğarı Pışma mäçeteneñ yaña imamı belän Milli Media-Xolding citäkçeläre urtaq tel taptılar. Söyläşü waqıtında Sverdlaw ölkäsendä häm Yuğarı Pışma şähärendä yäşäwçe möselmannar öçen bik küp kenä urtaq proyektlar eşlärgä kileşelde.

Fäwiä Safiullina

Yekaterinburg.

XS
SM
MD
LG