Accessibility links

сишәмбе, 6 декабрь 2016, Казан вакыты 15:15

Prezidentnıñ matbuğat xezmäte qayber oyışmalarnı cırçı Mostafinnıñ ülemennän säyäsi fayda ezläwdä ğäyepli


16 nöyäber könne Başqortstan Tatar milli oyışmaları berlege Ufada jurnalistlar öçen matbuğat oçraşuı oyıştırğan ide. Tatar oyışmaları älege oçraşuğa ike säbäp buluın äytte. Anıñ berse tanılğan tatar cırçısı Wener Mostafinnıñ faciğäle ülemenä bäyle waqíğalarnı añlatıp birü häm Başqortstan tatarlarınıñ 27 nöyäberdä ütäçäk qorıltayına äzerlek xaqında mäğlümatlar birü ide. Matbuğat oçraşuınıñ iñ kierenke häm xisle öleşe, aldan uq kötelüençä, Wener Mostafinnıñ üleme tiräsendäge xällärgä bäyle buldı. Matbuğat oçraşuına Tatar milli oyışmalarınnan tış, urıslarnıñ «Rus'» dip atalğan republík ictimağí oyışması häm Başqort xalıq kongressı wäkilläre dä kilgän ide. Menä şuşı oyışmalar Wener Mostafinnıñ ülemenä bäyle bik kisken belderü qabul itte häm anı bergäläp imzalağannan soñ, jurnalistlarğa tarattı. Belderüdä Başqortstan xakímítlarına usal ğäyeplär taşlana. Republíkta polísí däwläte rejimı urnaştırıluı, xalıqnıñ qurqu astında yäşäwe äytelä.

Şuşı Belderü qabul itelgännän soñ, ikençe könne Başqortstan prezidentınıñ matbuğat xezmäte başlığı Rostislaw Morzağulov republík xakímítları qaraşın cämäğätçelekkä citkerü öçen cawap Belderüe yasadı.

Rostislaw Morzağulov fikerençä, republíkta säyäsi säbäplär arqasında keşe üz ixtíarı belän bu tormışnı taşlap kitä torğan wäzğiät yuq. Anıñ süzlärençä, prezident Mortaza Räximov bu yıl başında uq uzğan yılğı saylawlarğa bäyle berkemne dä ezärleklärgä yaramí dip üz mönäsäbäten anıq beldergän. Şulay da Morzağulov äfände birgän atama buyınça quştırnaqlar «qayber sälamät bulmağan köçlär» üz – üzen ütergän keşene milli batır dip iğlan itä. Matbuğat sekretare Wener Mostafin faciğäsendä qayber ictimağí xäräkätlär liderları «säyäsi şarlar» cíarğa mataşa, dip ğäyep ata.

Şuşı Belderüenä qayber açıqlıqlar kertüen sorap, «Azatlıq» radíosı xäbärçese Rostislaw Morzağulovqa möräcäğät itte. –

Min üzemneñ kiçä äytkän süzläremnän baş tartmím, – di prezident matbuğat xezmäte başlığı.

(Morzağulov)

Sez Başqortstan prezidentınıñ matbuğat xezmäte başlığı Rostislaw Morzağulov fikerlären tıñladığız.

Tatar cırçısı Wener Mostafinnıñ faciğäle ülemenä bäyle Belderügä Başqortstan Tatar milli oyışmaları berlege räise Ramil Bignov ta qul quyğan. Bez aña da möräcäğät itep, Rostislaw Morzağulovnıñ Belderüenä häm ğäyepläwlärenä qarata fikeren soradıq. Ramil äfände äytüençä, Wener Mostafinnıñ faciğäle üleme uñayınnan Başqortstannıñ räsmi citäkçeläreneñ berse genä dä qayğı urtaqlaşu beldermäde. Şuña da alarnıñ üz östennän ğäyepne töşerü öçen, başqalarnı qaraltaçağın aldan uq farazlarğa bula ide. – İctimağí xäräkätlärne älege faciğädän säyäsi oçqolar cíarğa mataşuda ğäyepläw üze ük bernindi äxlaq qısalarına símí, – di Ramil Bignov. – Wener Mostafinnıñ üleme bar xalıqnı tetränderde häm republík xakímítları ütkärgän xata säyäsätkä tağın ber qat iğtibar yünältergä etärgeç kenä birde.

(Bignov)

Sez Başqortstan Tatar milli oyışmaları berlege räise Ramil Bignovnıñ Başqortstan prezidentı matbuğat sekretare Rostislaw Morzağulov Belderüenä qarata fikeren tıñladığız.

Äye, tanılğan tatar cırçısı Wener Mostafinnıñ faciğäle üleme tiräsendäge bäxäslär tiz genä tınmas äle. Älbättä, bügenge köndä bu ülemdä Başqortstan däwlät filarmonísı citäkçelege dä, Mädäniät ministerlığı da üz ğayıben tanırğa telämi, härberse cawaplılıqtan kitärgä tırışa. Ämma tikşerü eşläre äle dä däwam itä. Bu eşkä bäysez xoquqçılar da quşılaçaq ikän digän xäbärlär bar.

Fänis Fätxi, Ufa.

XS
SM
MD
LG