Accessibility links

шимбә, 10 декабрь 2016, Казан вакыты 04:14

Belarusta keşe xoquqları torışın tänqitlägän BMO qararı Rusiä tırışlığı belän tikşerüdän alındı


Comğağa qarşı töndä Berläşkän Millätlär Ğömüm Mäcleseneñ Keşe Xoquqları Komitetında Belarustağı keşe xoquqları mäsäläse tikşerelde. Quşma Ştatlar häm Yevropa Berlege äzerlägän qarar ölgesendä Belarusta keşe xoquqlarınıñ tupas bozıluına kisken tänqit belderelä. Ämmä Rusiä wäkile täqdime belän, bu qarar axır çiktä qabul itelmäde.

Quşma Ştatlar belän Yevropa Berlege äzerlägän qarar ölgesendä Belarusta oppozitsiä wäkilläreneñ xäbärsez yuğaluı, saylawlar waqıtında tärtip bozular, protest belderüçelär häm jurnalistlarnıñ qulğa alınıp qıynaluları turında äytelä. BMO Ğömüm Mäclese räsmi Minskinı saylaw sistemasındağı xilaflıqlarnı tözätergä, säyäsi ezärlekläwlärne tuqtatırğa, keşelärneñ yuqqa çığuları öçen cawaplı räsmilärne urınnarınnan alırğa çaqıra. Qararda nindi dä bulsa çaralar qaralmasa da, ul zur äxämiätkä iä.

Mäclesneñ keşe xoquqları komitetında Rusiä wäkile Andrei Nikiforov, ayırım ilgä qarağan rezolütsiälär urınsız, alar komitet eşen säyäsiläşterä, dip qararnı tikşermäskä täqdim itte. Bu täqdimne täräqqiy itüçe illärneñ kübese kütärep aldı, näticädä, 76-65 tawış belän, mäsälä tikşerüdän alındı.

Yevropa Berlegendä räislek itüçe Hollandia wäkile Koen van der Wolk Azatlıqqa birgän äñgämäsendä monı naçar näticä dip atadı:

Audio (Koen van der Wolk)

"Bu bäxäslärne tuqatu digän süz. Läkin bu bäxäslär bik möxim, söyläşülär barırğa tieş, xäzer alar bulmayaçaq."

Yaña qarar ölgesendä BMOnıñ keşe xoquqları komissiäse şuşı yılda qabul itkän rezolütsiägä kergän tänqitlär dä bar. Räsmi Minski bu tänqitlärne, keşe xoquqların säyäsi maqsatlarda qullanu, dip kire qaqtı. Utırışta çığış yasağan Rusiä wäkile Andrei Nikiforov wazğiätne başqçaça kürä:

Audio (Andrei Nikiforov)

"Belarusnıñ açıqlığın, keşe xoquqları mäsäläsendä dönya cämäğätçelege belän xezmättäşlek itergä äzerlegen iskä alğanda, bu qarar ölgese bigräk tä urınsız."

Quşma Ştatlar wäkile Frank Urbancic, Rusiäneñ bu adımın komitetnıñ eşen yuqqa çığaru dip atadı:

Audio (Frank Urbancic)

"Rusiäneñ bu adımı Belarusta keşe xoquqları häm töp irekleklär bozılunı tikşerü eşenä tupas ayaq çalu niäte bulıp tora. Axır çiktä bu adım komitetnı üz wazifasın ütäwdän mäxrüm itä."

Süz uñayınan, şuşı ay başında ğına Belarus Quşma Ştatlarnıñ üzendä keşe xoquqları torışın tikşerergä çaqırğan qarar ölgesen äzerläp kertkän ide. Uzğan atnada ul anı kire aldı. Rusiä wäkile Nikiforov Quşma Ştatlar da şundıy uq ğämäl belän cawap birergä tieş dide.

-Ali Gilmi
XS
SM
MD
LG