Accessibility links

Кайнар хәбәр

Ukraina: prezident saylawlarınıñ ikençe turı da xärämläşülär belän ütär dip kötelä


Bu yäkşämbedä xalıqara cämäğätçelekneñ iğtibarı Ukrainağa yünäläçäk diärgä bula, anda prezident saylawlarınıñ ikençe turı ütäçäk, xörmätle tıñlawçılar. Bu yulı köräş ike nämzät - premyer-ministr Viktor Yanukoviç häm oppozitsiä wäkile Viktor Yuçenko arasında ğına baraçaq. Xalıqara küzätüçelär, tawış birüneñ berençe turı törle citeşsezleklär belän ütte dip beldergän ide, xäzer isä prezident Leonid Kuçma, ikençe tur ğädel ütäçäk dip wäğdä itä. Ämma ul berük waqıtta, Yuçenko citäkçelegendäge oppozitsiägä işarä itep, Ukrainadağı qayber köçlär xakimiatne yawlap alırğa tırışa dip tä belderä.

Yäkşämbe könge tawış birüdä Ukrainanıñ bäysez däwlät bulu tarixındağı öçençe prezidentı açıqlanaçaq. Älegä şunı ğına äytergä mömkin, anıñ iseme Viktor bulaçaq, çönki ikençe turğa çıqqan ike nämzätneñ, xäzerge premyer-ministr Yanukoviçneñ dä, oppozitsiä citäkçese Yuçenkonıñ da iseme şundıy. Saylawlarğa äzerlek tä, anıñ berençe turı da, ä annarı ikençesenä äzerlänü dä törle cäncallar, ike yaqnıñ da ber-bersen xärämläşülärdä wä qanunsız ğämällär qıluda ğäyepläwlär belän barıldı. Yanukoviçne yaqlağan xäzerge xakimiat Yuçenkonıñ "Bezneñ Ukraina" berläşmäsen ilneñ könbatışındağı saylaw tartmalarına yalğan bülletennär saluda ğäyepli, oppozitsiä dä näq şunı uq xäzerge premyer-ministrğa qarata äytä. "Bezneñ Ukraina"nıñ saylawaldı äzerlegen alıp baruçı Oleh Rıbaçuk, xökümät saylaw komissiäläre xezmätkärlärenä täqdim itü öçen rişwätlärneñ nindi külämdä bula aluın maxsus bilgelägän bulğan dide.

Audio, Oleh Rıbaçuk

"Menä ayırım keşelärgä tülängän aqça, monıñ üz isemlege bar. 21-nçe noyäbr, yäğni berençe tur aldınnan, saylaw komissiäse başlığı, birelgän yöklämäneñ awırlığına qarap 10 meñ dollar ala, ägär dä ul anı üti ikän, aña şul uq külämdä östämä aqça birelä" dip belderä xakimiatneñ astırtın eşläre turında oppozitsiä wäkile. Soñğı könnärdä däwlät qulındağı ere industrial'' berläşmälärdä, politsiädä eşläwçe keşelärneñ şikayätläre işetelä başladı, alar, köçläp başqa urınnarda tawış birü röxsäten aluğa, ä annarı şul röxsätlärne Yanukoviç tarafdarlarına tapşıruğa mäcbür itelä digän xäbärlär kilä. Atnakiç parlament, çittä saylaw röxsäten beterü qararın qabul itte, läkin anıñ ğämälgä kerüe öçen prezident tarafınnan imzalanuı kiräk. Kuçma isä ikençe turğa qädär monı eşlämäskä dä mömkin. Xarkiv politsiäseneñ 5 yuğarı xezmätkäre üz isemnären äytmäw şartı belän radiobız xäbärçesenä, berençe turda üzläreneñ zurlap xärämläşüdä qatnaşuın tanıdı. Alarğa, Yanukoviç faydasına bilgelängän yartı millionlap bülletenne saqlarğa quşılğan bulğan. Soñraq alar törle saylaw urınnarına taratıldı dip belderä, politsiäneñ şuşı xezmätkärläre. Prezident Kuçma isä, ä ul üzeneñ premyer-ministr Yanukoviçne yaqlawın yäşermi, atnakiç, xakimiatneñ xärämläşüe turındağı xäbärlärgä ışanmawın äytte.

Audio, Leonid Kuçma

"Ukraina prezidentı namuslı, açıq wä demokratik tawış birüdä xalıq tarafınnan saylanğan keşe bulaçaq, min moña hiç kenä dä şiklänmim. Ukrainağa legitim, qanuni prezident kiräk" di ilneñ xäzerge citäkçese Leonid Kuçma. Ämma oppozitsiä anıñ şuşı süzlärenä ışanmıy häm üz tarafdarların yäkşämbe kön ütäçäk tawış birüdä, saylaw komissiäläre eşen küzätep toruğa öndi. Viktor Yuçenko:

Audio, Viktor Yuçenko

"Sez hiçşiksez üz qaraşlarığıznıñ sez alarnı yaqlıy alğan oçraqta ğına isäpkä alınaçaqğın añlarğa tieşsez. Saylaw urınnarınnan kitärgä aşıqmağız, anda köne buyı, bigräk tä kiçke 8-dän soñ, tawış birü tuqtalıp, sanaw başlanu belän anda bulığız" digän öndämä belän çığa oppozitsiä nämzäte Viktor Yuçenko. Saylawlarnıñ berençe turında tawışlarnıñ küpçelegen näq menä ul cıyğan ide.

Kärim Kamal
XS
SM
MD
LG