Accessibility links

шимбә, 10 декабрь 2016, Казан вакыты 11:55

Ğıraq saylaularğa äzerlänä, läkin, citeşsezleklär küp.


Kiläse yılnıñ 30-nçe ğinvarında , yaña xökümätne häm daimi konstitutsiä proyektın raslayaçaq küçmä çor parlamentqa saylaular ütkäreläçäk. Läkin, ğadi ğıraqlılarnı köç qullanunıñ dävam itüe moña niçek täsir itäçäk digän mäsälä birçıy. Şulay uq saylaular niçek ütäçäk häm kandidatlar kem bulaçaq digän soraular da yış quyıla. Qayber ğıraqlılar saylaularnıñ kiçektereüen xuplasa, başqaları bu eşneñ planlanğança buluın teli.

Ğıraqta saylaularğa taba adımnar atlana. Bagdat uramnarında terkälü öçen närsä eşlärgä digän mäsälädä kürsätmälär yazılğan plakatlar elengän. Xalıqnı saylaularda qatnaşırğa öndägän xitapnamälär taratıla. Saylauçılarnı terkäv eşe 1-nçe noyäberdä başlandı häm ul 15-nçe Dikäbergä qädäre dävam itäçäk. Saylau öçen cavaplı räsmilär isemlekne äzerläv öçen Saddam Xosäin çorınnan qalğan azıq-tölek talon sistemasın nigez itep qullanalar. Ğıraqlılar payokların alğanda ğailä ağzaları turında dokument ta alalar häm alar anda xata bulğan xäldä, bu xaqta xäbär itärgä tieşlär. Azıq-tölek agentlğında eşlävçe häm saylaularğa terkälü formların taratuçı Abu Ammar bu xaqta radibız xäbärçesenä bolay dide.

Audio

"Keşelär terkälü formların sorıylar. Alarnı kiterdegezme, qayçan taratasız dip sorıylar. Bez alarnı kiterdek häm ğailälärgä taratabız. Bez kilgännärgä formlarni biräbez, kilmägännärgä kilsennär dip xäbär itäbez. Kilä almağan xäldä, bez öylärenä barıp alarnı biräbez. Allah quşsa bez bu eşne saylaulardan alda tämamlarbız."

Ğıraq xalqınıñ yaqınça 60 protsentın şiğıylär täşkil itä häm alar bu saylaularnıñ näticäsendä çağılır dip ömet itä. Şeyx Ali- al-Bağdadi , oluğ ayatolla Al al-Sistaninıñ saylaularnı yaqlauı säbäple, şiğıylär anda qatnaşaçaq digän fikerdä.

Audio

"Dini xakimiätlär saylaular turında söyläştelär häm iñ yuğarı xakimiät bu xaqta fetva çığardı. Saylaularnıñ maqsäte , yaña diktatornıñ xakimiätä kilüenä yul quymayaçaq saylanğan milli mäçlesneñ daimi konstitutsiä proyektın äzerläve."

Ğıraq şiğıyläre ozaq vaqıt Sadam Xösäin xakimiäte astında cäberlände häm saylaular vaqıtında busın dip taläp itälär. Läkin, sönnilär yäşägän töbäklärdäge köç qullanular säbäple küpkenä sönnilär saylaularnıñ kiçekterelüen teli. Täsirle sönni törkeme , Möselman ğalimnäreneñ berläşmäse , AQŞ citäklägän Fallucağa höcüm säbäple , boykotqa çaqırdı. Täsirle berläşmäneñ başlığı Hareth al-Dhari bolay dide

Audio

"Ğıraq xalqınıñ şäräfle ruxanilären saylaularğa boykot iğlan itärgä çaqırabız. Bu saylaularnı Ğıraq xalqınıñ mäyetläre torğan häm yaralılarnıñ qannarı sengän Fallucah häm Ğıraqnıñ başqa şähärlärendä ütkärü planlanğan. Saylaular Ğıraqnı okkupatsiälägän köçlärneñ maqsätenä ireşüen añlatır ide."

Ğıraq xalqınıñ zur öleşe äle dä saylaular häm kandidatlar turında bixabär. Küpkenä ğıraqlılar bu prezident sayluaları dip tä uylıylar. Bügenge köndä 150 politik partiä bar. Läkin, alarnıñ 40-50se genä terkälä alu şartın ütiäçäk kebek. Terkälü öçen partiäneñ iñ kimendä 500 ağzası bulığa tieş.

Färit İdelle, Praga.
XS
SM
MD
LG