Accessibility links

якшәмбе, 11 декабрь 2016, Казан вакыты 11:01

Tatarstanda Ukraina Prezidentı saylawları belän qızıqsınalar


Tatarstanda yäşäwçe ukrainnar Prezident saylawları kebek waqiğağa bitaraf qala almadılar. Tatarstandağı ukrainnar oyışması citäkçese Lubçenko Vladimir Nikolay ulı, saylaw näticälären kötep, tön buyı yoqlamadıq di. Belgänegezçä, saylawlarnıñ berençe öleşendä ukrain cämğiäte Ukraina watandaşları öçen respublikada saylaw urınnarın oyıştırırğa telägän ide. Ämma ul waqıtta kilep çıqmadı. Mäskäwdän oyıştırılğan maxsus poyezdlarğa da Tatarstandağı ukrainnar elägä almağan. Ä saylawlarda qatnaşır öçen genä, Ukrainağa qaytıp kilü mömkin eş tügel, çönki bik qıybatqa töşä, dip añlattı Vladimir Lubçenko. Ul üze Rusiä watandaşlığın alğan, ämma saylarğa mömkinlege bulsa, Yanukoviç öçen tawış birer ide. Çönki anıñça bu säyäsätçe Ukraina häm Rusiä arasında eşlekle mönäsäbätlär urnaştır alar ide, dip sanıy ul. Tatarstanda räsmi terkälgän 529 ukrain keşese yäşi, räsmi terkälmiçä, berniçä meñ ukrain keşese bar dip isäplänä. Alar tawış birüdä qatnaşa almadı, ämma bitaraf ta bulmadı. Ukrain milli kongressınıñ isemennän, saylawlarğa küzätüçe bularaq Tatarstandağı Ukrain cämğiäte wäkile Savçuk Boris äfände barıp qaytı. Ul «Azatlıq»qa intervyu birergä telämäde, barı tik Dnepropterovskiyda saylaw aldınnan buluın, qanun bozularnı kürmägänen añlattı. Anıñ äytüençä, ul Yuşenko belän yaqtaş, ämma Rusiä Watandaşı bulğanğa, tawış birüdä qatnaşa almağan.

Tatarstandağı xakimiätlär älegä saylawlar näticälärenä qarata reaksiä beldermäde. Tatarstannıñ Ukrainada neft qorılması bar. Xökümätne Ukraindağı saylaw näticäläre borçısa da, «Ukrtatnafta» kebek şirkätneñ uñışlı eşläwe öçen qaysı Prezident yaxşıraq buluı xaqında räsmi belderülär yuq. Barı tik räsmi bulmağan çığanaqlar, Ukraina Prezidentı Viktor Yanukoviç bulsa, Tatarstannıñ mänfäğätläre saqlanaçaq, dip xäbär itte.

Bikä Timerova.

XS
SM
MD
LG