Accessibility links

якшәмбе, 4 декабрь 2016, Казан вакыты 23:28

Bötendönya tatar kongressı başqarma komitetı Sverdlov ölkäsendä bulıp kitte


Bötendönya tatar kongressı başqarma komitetı äğzalarınnan torğan delegatsiäneñ küptän tügel Sverdlov ölkäseneñ könçığış häm tönyak rayonnarında urnaşqan şähär häm poseloklarında bulıp kitüläre biredä yäşäwçe tatarlar öçen bik zur, istä qalırlıq waqiğa buldı.

Bu waqiğalarğa Sverdlov ölkäse buylap Tatarstan – yaña ğasır sputnik telekanalı tapşıruların kürsätergä yaraqlaştırılğan sputnik tälinkä komplektların quyu häm alarnı täqdir itü sıltaw bulıp torsa da, oçraşular waqıtında bik citdi mäs'älälär kütärelde. Äytik, tatarlar küpläp yäşägän Bulanaş şaxterlar poselogında bulıp, andağı xällärne üz küzläre belän kürep, xalıq belän dä, xakimiät wäkilläre belän dä oçraşqannan soñ, bötendönya tatar kongressı başqarma komitetı räise urınbasarı İlsur Hadiullin üzeneñ fikerlären bolay dip belderde.



-“Bulanaş poselogınıñ qayçandır, şaxtalar eşläp torğan çaqta bik matur, bay poselok buluı bilgele. Poselok muzeenda bezgä Bulanaş tatarları turında bik ğorurlanıp söylädelär. Tarixqa kerep qalğan millättäşlärebez arasında Sotsialistik xezmät geroyları, Sovetlar Soyuzı geroyları küp. Başqa millät keşeläre, ruslar alar turında bu bit bezneñ xalıq, bezneñ poselok tatarları dip bik ğorurlanıp söylädelär.

Ämma bügenge köndä poselok bik ayanıç xäldä. Şaxtalar yabılğan, eş yuq. Eçüçelek, narkomaniä kebek yämsez küreneşlär monda da ütep kerä başlağan. Xalıq belän oçraşqan waqıtta täcribäle şaxterlarnı vaxta yulı belän Qazan metrosı tözeleşenä eşkä urnaştırıp bulmas mikän digän süz quzğatıldı. Bu mäs'älä turında uylarğa kiräk. Ägär dä metro tözeleşenä eş qulları kiräk ikän, nigä soñ iñ berençe çiratta üz millätebez keşelären eş belän tä'min itmäskä. Şaxterlar bit alar bik altın qullı keşelär”.

Bulanaş poselogınnan tış, Bötendönya tatar kongressı başqarma komitetı delegatsiäse, Yekaterinburgta eşläp kilüçe Milli Media-Xoding citäkçeläre belän berlektä, Sverdlov ölkäseneñ Krasnoural'ski, Severoural'ski, Serov şähärlärendä buldılar. Här oçraşuda da cirle xakimiät orğannarı wäkilläre qatnaştı.

Oçraşularnıñ şundıy yuğarı däräcädä uzuı anda yäşäwçe tatarlarğa qarata mönäsäbätne yaxşırtuı bäxässez. Xakimiät orğannarınıñ da milli säyäsätne añlap eş itüläre kürenep tora.

Çınlap ta, bu oçraşular töbäklärdä yäşäwçe tatarlar öçen qızıqlı ğına tügel, bik faydalı da buldı. İlsur Hadiullin bu oçraşularnı oyıştıruçı Milli Media-Xolding citäkçeläre xezmäten bik yuğarı bäyäläde. – “Töbäklärdä änä şundıy milli canlı, imanı nıq bulğan tatarlar barinda töbäklär nıqlı bulır, - dide ul, - töbäklär nıqlı bulsa, bezneñ tatar xalqı da kiläçägenä nıqlı adımnar belän atlar”.

Milli Media-Xolding citäkçeläre, Bötendönya tatar kongressı başqarma komitetı belän berlektä, yıraq töbäklärdä yäşäwçe tatarlarnıñ mänfäğätlären qayğırtu buyınça urtaq eş yunäleşlären bilgelädelär.

Fäwiä Safiullina. Yekaterinburg.

XS
SM
MD
LG