Accessibility links

җомга, 9 декабрь 2016, Казан вакыты 03:06

Tatarstanda xalıq sanı artqan


Respublika parlamentı citäkçese Färit Möxämmätşin 23 noyäberdä Mäskäwdä uzğan fänni-ğämäli konferensiädä qatnaştı. Anda Rusiädä federativ häm milli mönäsäbätlärne kamilläşterü xaqında söyläştelär. Ä Qazan däwlät texnik universitetında sişämbe könne innovatsion belem birügä bağışlanğan cıyılış eşli başladı. Anda texnik uqu yortlarında yañaça belem birü yulları xaqında söyläşü bara. Sişämbe könne Qazanda 2002 yıldağı xalıq sanın alunıñ respublika buyınça näticälären iğlan ittelär. Böten Rusiädä xalıqnıñ sanı kimi barğanda, tatarstanlılar isä 138 meñ keşegä artqan. Xäyer, bu artu bezdä balalar küp tuu belän tügel, ä Tatarstanğa çittän küp keşe qaytu belän bäyle. San buyınça bez 8 urında torabız ikän. Respublikada tatarlarnıñ sanı da 4 protsentqa artqan. Can isäben alu Tatarstanda keräşennärneñ 19 meñgä yaqın buluın da açıqlağan.

Uzğan tapşıruıbızda bez sezgä Mintimer Şäymievqa Rusiäneñ Milli olimpı premiäse birelü xaqında xäbär itkän. Läkin älege bäygedä Tatarstannıñ prezidentı tügel, ä başqa respublika wäkilläre dä ciñü yawladı. Mäsälän, İñ yaxşı mer nominatsiäsendä Qazan xakimiäte başlığı Kamil İsxaqov ciñep çıqqan. Küp kenä qazanlılar bu uñaydan bäygene oyıştıruçılar üzläre şähärne kürdelärme ikän, dip uylana. İñ äybät citäkçeneñ şähäre şundıy bulğaç, başqalar nindiräk xäldä ikän, dip borçıluçılar da yuq tügel. Şulay uq älege bäygedä Tatarstannıñ Tatenergo berläşmäse dä ciñügä ireşkän. Mäskäwneñ Kreml’lär zalında berläşmäneñ general’ direktorı İlşat Färdievqa dä Altın Olimp büläge tapşırılğan.

Tatarstannıñ xoquq saqlaw organnarı wäkilläre dä bik tırışıp eşli. Küptän tügel genä Üzäk Aziädän kilep, respublikada ekstremistik törkem oyıştıruçı totıluı turında bez dä xäbär itkän idek. Läkin alar monıñ belän genä çiklänmiçä, üzläreneñ kvalifikatsiälären kütärü belän dä şöğellänälär. Şuşı könnärdä genä respublikanıñ 20 Eçke eşlär xezmätkäre İzrail’dän qayttı. Anda Eçke eşlär ministrı urınbasarı Räfil Noğmanov citäkçelegendäge bu törkem terrorizm häm ekstremistik oyışmalar belän köräş ısulları belän tanışqan. Şul uq waqıtta İzrail xoquq saqlawçıların tatarstanlılarnıñ maxsus törkemnärendä tuplanğan täcribäläre dä qızıqsındırğan. Bu xaqta Tatar-inform agentlığı xäbär itä.

Axırda – sport xäbärläre. Aq Bars xokkey komandası üzeneñ çirattağı ciñüenä ireşte. Düşämbe kiçendä klubnıñ sportçıları Ufada Salawat Yulaev komandası belän 2-1 xisabı belän uynadılar. Älege uyında xälitkeç şaybanı Aq Barsqa NXLdan kilgän Sergey Zinov’ev kertte. Xäzer Zinnätulla Biläletdinov citäklägän respublika komandası Rusiä çempionatınıñ turnir tablitsasında öçençe urında. Ä menä çempionat başında yaxşı ğına uynağan tağın ber Tatarstan komandası – Tübän Kamanıñ Nefteximigı soñğı aralarda yış qına bireşä başladı. 22 noyäberdä uzğan uyında da alar inde 7 märtäbä ciñeldelär. Bu yulı Nefteximiktan Tolyattinıñ Lada xokkeyçıları köçleräk buldı.

Gölnaz İlgizär

XS
SM
MD
LG