Accessibility links

шимбә, 3 декабрь 2016, Казан вакыты 22:57

Mäskäwdä tamaşalar atnalığı


Uzğan şimbädä mäskäwlelär Başqortostannıñ xalıq, Tatarstannıñ atqazanğan cırçısı Näzifä Qadıyrova belän oçraştı. Näzifä Qadıyrovanıñ Mäskäwgä mondıy zur programma belän kilgäne yuq ide äle. Mäskäw tamaşaçısı da anı Salawat Fätxetdinovnı belgän kebek belmi. Şulay buluğa qaramastan, inde tatar tamaşa törkemnäre terkälü alğan “Kosmos” qunaqxanäseneñ meñ keşelek zur konsertlar zalı tulı ide. Bıyıl üzeneñ yubileyın Ufada zur itep ütkärgän Näzifä Qadıyrova Mäskäwdä dä programmasın üzeneñ benefis konsertı itep oyıştırğan ide. Anıñ belän Ufadan “Ufa” dip atalğan muzıykantlar törkeme dä, bayanist Ğali Altınbayev ta, süz ostası Gölsem Xabibullina, biüçelär Fäniä häm Rafayıl Amantayevlar häm başqalar kilgän ide.. Şulay uq Näzifäneñ bu bäyrämendä qatnaşırğa Qazannan Ferdinand Säläxov, yaş cırçılar Güzäl Urazova häm İldar Xäkimovlarnı da alqışladı mäskäwlelär. Ä inde mäskäwlelär isemennän konsertta Tatarstannıñ atqazanğan cırçısı Roza Xabibullina qatnaştı häm qotladı. Mäskäw säxnäsenä menep Näzifä Qadıyrovanı Tatarstan häm Başqortostannıñ wäkälätle wäkillekläre dä, Mäskäwneñ dini idäräse dä, yaqtaşları, awıldaşları da qotladı. Qotlawlar artıqqa kitte buğay. Qayber tamaşaçılar bu xällärgä rizasızlıq ta belderep, cır tıñlarğa kilgän idek dip, zaldan tawış ta birep utırdılar. Bu tamaşanı Başqortostan televideniese töşergängäme, ällä çınlap ta başqa säbäp barmı, Näzifä Qadıyrova bu yulı süzlären dä cırların da barı tik başqort telendä genä alıp bardı. Zalda utırğan zıyalı tamaşaçılar cırnıñ nindi teldä başqarılğanına iğtibar itmi, cırçınıñ güzäl tawışına, başqaru ostalığına qul çaptı. Häm tamaşadan bik qänäğät qalğanın belderde, Läkin başqort telen tügel, tatar telen dä bik yaxşılap belmäwçe tamaşaçılar rizasızlıq belderep tawışlanıp alsalar da berkem dä konsertnı taşlap kitmäde. Çönki hawa torışı naçar bulu säbäple oçqıç Mäskäwgä tügel. Başta Tübän Novgorodqa töşep, annan inde uraw yullar belän säxnägä kilep citkän Qazan cırçısı Güzäl Urazovanı kötte xalıq. Häm ul cırçını tıñlaw bäxetenä ireşte dä.

Berniçä qısqa xäbär. Mäskäwdä bıyıl tatar kompozitorlı bülekçäse oyışqan ide. Yäkşämbe könne alarnıñ utırışları bulıp ütte. Kompozitorlar “Mäskäw moñnarı” dip atalğan milli mädäni möxtäriät tırışlığında dönya kürgän yaña cırlar cıyıntığın täqdim ittelär Häm üze xärbi keşe bulsa da inde baytaq qına cırları mäskäwlär öçen populyar cırlarğa äwerelgän Röstäm Nevretdinovnı üz oyışmalarına qabul ittelär.

Tağı ber xäbär. Ütkän yäkşämbedä Mäskäwneñ milli mädäni üzägendä “Xadidca” dip atalğan dini xatın qızlar oyışması balalar öçen Ramazan bäyräme ütkärde. Ul Xadidca digän oyışmanı tatarçalatıbraq äytsäñ ul Xädiçä bula torğandır inde. Läkin bu oyışmanıñ bäyrämenä kilüçelärneñ barı tik rusça ğına söyläşüläre ğäcäpländerde beraz. Barısı da yawlıqtan, rus süzläre arasında ğäräp süzläre dä işetelep kitä.. Baqsañ bu oyışmanı Tat'yana isemle ğäräp keşesenä kiäwgä çıqqan urıs xatın- qızı oyıştırğan ikän. Anda küp törle millätlär kergän. Xätta ul oyışma äğzası bulğan tatar xatınnarı da tırışıp-tırışıp urısça söyläşälär. Ä närsägä bezgä tatar tele dide ber xanım, bez din totabız, islam bar millätlär öçen dä ber, dide ul. Anısı şulay, elek bez dinebez telebezne saqladı disäk, xäzer inde kiresençä kilep çığa tügelme soñ? Älbättä, milli mädäni üzäktä tatar tele däresläre dä ütep tora. Balalar da yäşlär dä küpläp kilä başladı xäzer. Döresen äytkändä, yal könnärendä tatar üzäge görläp tora. Şulay buluğa qaramastan , tatar milli mädäni üzägendä tatar telendäge çaralar yışraq bulsın ide dip äytäse kilä. .

Ä inde 27 noyäberdä milli mädäni möxtäriät binasında ike çara planlaştıyrgan. Anıñ berse Sara Sadıyqovanıñ qızı Älfiä Aylarskayanıñ ätisenä bağışlap yazılğan kitabın täqdim itü bulsa. İkençe zur çara dip, Başqortostan tatarlarınıñ qorıltayı ütü kötelä. Alar öçen Başqortostanda urın bulmaw säbäple 150 delegat Mäskäwgä kilep uzdıraçaq ikän oçraşuların. Uzğan ğasır başınnan alıp sanasañ, Asadullayev yortı dip atalğan bu binada tatar möselmannarınıñ küp oçraşuları da syezdları da ütkän. Bälki Başqortostan tatarlarınıñ bu oçraşuı da tarixi oçraşu bulır.

Näzifä Kärimova, Azatlıq radiosı . Mäskäw.

XS
SM
MD
LG