Accessibility links

Кайнар хәбәр

Ukraina: qarşılıq çaraları däwam itä, Yuğarı Rada ğädättäntış utırış ütkärde


Yäkşämbedä ütkän prezident saylawlarınnan soñ anda kierenkelek arta. Düşämbedä üzäk saylaw komissiäse premier-ministr Viktor Yanukoviçnı ciñüçe dip iğlan itte. Oppozitsiä namzäte Viktor Yuçenko exit-poll näticälärenä tayanıp, xökümätne xärämläşüdä ğäyepli häm üzeneñ ciñünen belderä. Sişämbedä Kievta yöz meñläp keşe qarşılıq aksiäse ütkärde. Ukraina parlamentı ğädättän-tış utırışqa cıyıldı.

Kievta şaqtıy salqın buluğa qaramastan Yuçenkonıñ meñlägän tarafdarı uzğan tönne Bäysezlek mäydanında qorılğan 300läp çatırda ütkärde. İlneñ törle töbäklärennän başqalağa protest belderüçelär kilä. Sişämbedä namayışta yözlägän meñ keşe qatnaşa dip äytelde. Oppozitsiä citäkçese Viktor Yuçenko mitingta çığış yasap alarğa räxmäten belderde:

Audio (Viktor Yuçenko)

"Ukrain xalqında, tönen monda, salqında uzdırğan keşelär bulu belän min ğorurlanam, alar monı üzläre öçen tügel, Ukraina öçen eşli."

Kiev qalası häm Könbatış Ukrainanıñ berniçä töbäge räsmi näticälärne tanımawın, üz prezidentları itep Viktor Yuçenkonı sanawın belderä. Berniçä yuğarı uqu yortı studentları protest yözennän uquların taşladı. Oppozitsiä wäkilläre äytüençä, bu saylawlarda xakimiät, üz namzäte Yanukoviçnı prezident itü öçen küp sanlı xärämläşügä barğan, tawış birü tartmalarına yalğan bülettennär tutırğan, berük keşelärgä berniçä tapqır tawış birü mömkinlege birgän. Yevropada İminlek häm Xezmättäşlek oyışması küzätüçeläre saylawlarnı demokratiä taläplärenä turı kilmägän dip taptı. Quşma Ştatlardan baş küzätüçe, senator Richard Lugar, bu xärämläşülärdä, ixtimal xökümät keşeläre dä qatnaşqan, digän näticä yasadı.

Oppozitsiä citäkeçläre Parlamentnıñ ğädättän-tış utırışın ütkärergä, Üzäk saylaw komissiäsen häm anıñ näticälären köçtän çığarırğa çaqırdı. Yuçenko xalıqnı tınıçlıq saqlarğa, provakatsiälärgä bireşmäskä, Rada binasına taba barırğa çaqırdı:

Audio (Viktor Yuçenko)

"Min parlamentta, Üzäk saylaw komissiäse häm anıñ cirle bülekçäläre totqan antların bozğan dip qul kütärerlek 226 keşe tabılıp dip ömetlänäm."

Ber säğätkä soñarıç başlanğan Rada utırışına ni barı 191 keşe terkälde, kübese älbättä oppozitsiä deputatları. Parlament räise Volodimir Litvin utırışnı açıp bolay dide:

Audio (Volodimir Litvin)

"Parlament bügen qarar qabul itergä tieş, yuq isä, irtägä bezneñ öçen xalıq qarar itäçäk."

Çığış yasawçılarnıñ barısı da, şul isäptän qırım tatarları wäkile Rifat Çubarov, Ukrainanıñ çın prezidentı itep Viktor Yuçenkonı tanuın äytte. Oppozitsiädäge Batkivçina partiäse citäkçese Yulia Timoşenko, anı xättä şuşı minittan uq prezident dip iğlan itte:

Audio (Yulia Timoşenko)

Rada başlığı Volodimir Litvin berniçä tapqır kisätülär yasap öndäwlär belän şägellänmskä çaqırdı, ämmä axır çiktä, Radanıñ iñ qart deputatı çığış yasağanda, utırışnı yabıq dip iğlan itep, çığıp kitte. Şulay itep, Rada älegä ber qarar da qabul itmäde.

Yevropa illäreneñ berse dä Ukrainada iğlan itelgän räsmi näticälärne tanımadı. Dönya citäkçelärennän ni barı ike keşe Yanukoviçnı ciñüe belän qotladı. Berse - Belarus prezidentı Aläksandr Lukaşenka, ikençese – Rusiä prezidentı Vladimir Putin.

-Ali Gilmi
XS
SM
MD
LG