Accessibility links

шимбә, 10 декабрь 2016, Казан вакыты 00:23

Başqortstan tatarları Mäskäwgä Qazan aşa bara


Başqortstan tatarları qorıltayı Ufada tügel, ä Rusiä başqalasında ütü iğtibarnı cälep itä torğan, ğädättän tış waqiğa. Qazandağı säyäsätçelär älege Qorıltaynı ni öçen Ufada ütkärergä röxsät birmäwen añlamıy. Bilgele eşquar Başqortstan tatarları ictimaği oyışmalar sovetı räise Ramil Bignov Mäskäwgä säfärne oyıştıru häm Tatarstan aşa ütkändä bulaçaq oçraşular turında kiñäşärgä Qazanğa kilgän ide. Başqortstannan Mäskäwgä baruçı delegatsiä wäkilläre Qazanda häm Çallıda miting ütkärü öçen ğarizalar birep, röxsät tä alğannar. Alar fikerençä, şuşı säfär waqıtında milli cämäğätçelek wäkilläre Başqortstandağı xällärne töpleräk öyränep, tuplanu häm Başqortstan tatarların yaqlaw çaraları turında söyläşü faydalı bulaçaq. Ämma Qazandağı räsmi orğannar häm ictimaği oyışma wäkilläre älege mä’säläneñ çeterekle buluına iğtibar ittelär. Başqortstan tatarları milli-mädäni moxtariäte cıyılış qorıltayın Mäskäwdä ütkärergä qarar itelep, tieşle röxsätlär alınğan ikän, moña ber kem qarşı kilä almıy. Ministrlar kabinetında zur citäkçelär belän söyläşkändä Ramil Bignovqa Ufadan Mäskäwgä barğanda, Qazanda miting ütkärüne qayber dairälär älege çaranı Tatarstan oyıştıra digän tä'sir qaldırmasqa kiräklege äytelgän. Xätta Ufadan Mäskäwgä tağın da turıraq, Qazanğa bötenläy kermiçä oyıştırılsa, yaxşıraq bulmasmı digän täqdim dä yasalğan. Respublika citäkçeläre öçen bügen Rusiädä xakimiät reforması ütkärgändä, töbäklärneñ mänfäğätlären yaqlaw, cirle parlamentlarnı quıp, tarattırmas öçen töbäklärne berdäm xäräkät itü iñ möhim burıç bulıp tora. Räsmi orğannar, däwlät oyışmaları, bigräk tä xäzer Tatarstan belän Başqortstan arasındağı mönäsäbätlärne yaxşırtırğa tırışqanda saqlıq kürsätälär. Ämma milli zıyalılar, Tatar Kongressı citäkçeläre fikerençä, Başqortstan tatarlarınıñ problemalarınnan, mänfäğätlärennän çitläşü xisabına demokratiäne häm federalizmnı saqlap bulmıy. Qısqası, bik kierenke häm küpyaqlı söyläşülärdän soñ Başqortstan tatarlarınıñ Mäskäw yulındağı oçraşuların häm säyäsi çaraların tä'min itüne däwlät orğannarı tügel, ä ictimaği oyışmalar üz östenä aldı.

Şulay itep, pänceşämbe könne berniçä avtobusqa utırğan distälägän Başqortstan tatarı delegatları milli cämäğätçelek belän oçraşalar. Ä kiçen alar Qazanda yal itärgä tuqtala. Biredä Başqortstan tatarların Bötendönya tatar Kongressı qarşılıy. Salqın hawada säyäsi miting ütkärügä qarağanda, cılıda mädäni kiçä, millättäşlär oçraşuı qulayraq dip tabıldı. Ufadan Mäskäwgä baruçı mosafir delegatlar belän oçraşuğa Qazanda yäşäwçe Başqortstan tatarları kiläçäk. Ufalılar yaqtaşlar häm tatar kongressı wäkilläre belän oçraşıp qına qalmayaçaq. Qazan sanatoriäseneñ klubında ütäçäk bu oçraşuda Qazanda yäşäwçe Başqortstan tatarlarınıñ yaqtaşlıq mäs’äläläre tikşereläçäk. Moña qädär Başqortstannan kilep, Tatarstanda yäşäwçe millättäşlärneñ mondıy cämğiäte bulmadı. Tuğan yaqnı, Başqortstanda yäşäwçe millättäşlärne olılawda, alar turında qayğırtu eşendä abruylı eşquarlar, sänğät, mädäniät, fän eşlekleläre qatnaşa alalar. Şulay itep atna kiç Qazan üzägendäge sanatoriy klubında yaqtaşlar oçraşuı, urtaq problemalar turındağı kiñäş qızıqlı ütärgä tieş. Ä comğa irtäsendä Başqortstan tatarları üz säfärlären däwam itep, Tübän Novgorodqa häm Mäskäwgä yul totaçaq.

Al'bina Zäynulla

XS
SM
MD
LG