Accessibility links

шимбә, 10 декабрь 2016, Казан вакыты 06:06

Qazanda latin xärefläre belän yaña kitap basıldı: Tatarstan-Törkiä: mädäni bağlanışlar, 1992-2003


Latin xärefläre belän basılıp çıqqan kitapnı kiñ cämäğätçelekkä täqdim itü çarası, milli mäs`älälär xaqında borçılıp yöri torğan keşelärgä cıyılıp söyläşergä uñay säbäp buldı. «Tatarstan-Törkiä: mädäni bağlanışlar (1992-2003) » digän kitapnı täqdim itügä, tatar zıyalıları, mäqälälär avtorları, ğalimnär, Törkiä wäkilläre cıyıldı. Utırıştağı söyläşülär kitap çığu turında tügel, ä anıñ ähämiäte, Tatarstan häm Törkiäneñ mädäni bağlanışları, törek häm tatarnıñ mäğrifätçeläre, yäşlärne milli ruxta tärbiäläw, telne saqlaw häm latin mäs’äläse turında bardı. Kitapnıñ tözüçese İlbaris Nadirov äytüençä, bu cıyıntıq Äxät Wäli Mänğär wäqıfı finans yärdäme belän basılıp çıqqan.

Kitap, Tatarstan häm Törkiäneñ bağlanışların kürsätüçe häm törle yıllarda çıqqan mäqälälärdän tora. Anda şulay uq, ike yaqlı xezmättäşlekne çoqıldıruçı räsemnär dä urın alğan. Şuşı yazmalar aşa da Tatarstannıñ, xalıqara tormışta soñğı 10 yılda nindi yul ütkänen çamalap bula. Mäsälän, kitapta respublikanıñ 1992 yılda yasağan berençe räsmi säfärlärennän alıp, bügenge xällärgä qädär mäğlümat tuplanğan. Cıyıntıqta räsmi oçraşular, Törkiädä ütkän fänni cıyılışlar xaqında mäğlümat, yasalğan notıq, törek telennän tärcemä itelgän mäqälälär kergän. Latin xärefläre belän basılğan kitap bulğaç, latin mäs’äläse xaqında da süz bulmıy qalmadı. Kitapnıñ tözüçese İlbaris Nadirov, bügenge şartlarda pozitsiäbezne yaqlaw zorur, dide.

Anıñ fikerlären yazuçı Rabit Batulla da, üz çığışında qüätläde. Ul latinnıñ tıyıluın üzençä añlata. Rabit Batulla fikerençä, kem latinğa qarşı - şul Rusiäneñ tarqaluın teli. Bu süzlär «Tatarstan-Törkiä: mädäni bağlanışlar (1992-2003) » digän kitapnı täqdim itü kiçäsendä äytelde. İşetkänegezçä, bu xezmät latin xärefläre belän basıldı. Şuşı kitap, Äxmät Wäli Mäñgär wäqıfı yärdäme belän häm latin imlasında çığarılğan inde 7nçe xezmät bulıp tora.

Bikä Timerova.

XS
SM
MD
LG