Accessibility links

Кайнар хәбәр

Straw – Şaron oçraşuı Şaronnıñ awıruı säbäple kiçekterelde


İzrail'gä kilgän Britaniä tışqı eşlär ministrı Jack Straw İzrail' premyer ministrı Ariel Şaron belän oçraşu irtägä bulaçaq dip belderde. Şaron bügen bulırğa tieşle oçraşunı awırıp kitü säbäple kiçekterde. Şaron belän Straw Fälestinlelärgä prezident saylawların oyıştıruda niçek yardäm itü turında söyläşäçäk. 9-nçı ğinwarda fälestinlelär wafa bulğan Yassir Arafat urınına yaña citäkçe saylıy. Xalıqara aradaşçılar yaña citäkçe İzrail' belän tınıçlıq söyläşülären yañarta alırday urta yul fälestinle bulır dip ömetlänä.

İzrail' premyer ministrınıñ idaräse äytüençä, Şaronnıñ xäle äybät, ämma ul tawışsız qalğan häm Straw belän oçraşu kiçekterelgän. Düşämbe könne AQŞ däwlät sekretare Colin Powell kilgäç İzrail' Fälestinlelärgä saylawlarnı ütkärü ciñelräk bulsın öçen Könbatış Yarnıñ okupatsiälängän öleşendä xärbi çaralarnı kimetep torırğa wäğdä birde. Bügen İzrail' tışqı eşlär ministrı Silvan Şalom İzrail' xalıqara küzätüçelärgä fälestin saylawların küzätü mömkinlege biräçäk dide. Straw Şalom belän oçraşudan soñ İzrail'neñ bu saylawlarnı yaqlawı turındağı belderülären qänäğät buluın äytte.
XS
SM
MD
LG