27 noyaber Mäskäwdä Başqortstan tatarları qorıltayı ütäçäk

Ufa tatarları milli-mädäni moxtäriäte utırışı bulıp ütte.Anda 27nçe noyäber Mäskäwdä bulaçaq qorıltayğa äzerlek mäsäläläre qaraldı.Baruçılar isemlege , tözeläçäk oyışmanıñ şura häm idarä äğzaları isemlege qaraldı.Qabul iteläçäk doqumentlarnıñ ölgeläre tikşerelde. Moxtäriät oyıştıru qorıltayı uzası könne Mäskäwdä “Berdäm Rusiä“ firqäse qorıltayı da bula.Moxtäriät tözergä baruçılar eşlären “Berdäm Rusiä“ firqäse qorıltayı bulaçaq bina qarşında piket ütkärü belän başlarğa cıyına.“Berdäm Rusiä“ citäkçelege isä anı ütkärmäwne sorağan. Başqortstan tatar cämägätçelege oyışmaları şurası räise urınbasarı Mäcit Xucin Mäskäwdä bulaçaq matbuğat oçraşuında üzeneñ “Berdäm Rusiä“ firqäse safınnan çığaçağın belderergä cıyına.Ul Mäskäwgä barışlıy qarşılıq tudırsalar üzeneñ açlıq iğlan itäçägen dä ireşterde.Aña tağın ike keşe quşılırğa riza buluların belderdelär. Alar : iqtisad fännäre doktorı Rinat Ğatawllin häm kompozitor Alik Loqmanov. Moxtäriät tözü qorıltayına respublika xakimiäte tiskäre qaraşta.Başqortstan Prezidentınıñ cämägätçelek belän eşläw bülege başı Ämir Yuldaşbayıv monı “pıçraq aqçalar yärdämendä oyıştırılğan qara piar“ dip bäyäläde.Bu xaqta “Başinform“ ağentlığı xäbär itte. Başqortstan tatarları kongressı başqarma komitetınıñ bertörkem äğzaları tatar cämägätçelege oyışmalarına möräcägät belän çıqtı.Anda qorıltay cıyu öçen säbäplär bulmawı häm yaña oyışma tözü moxtaclığı yuqlığı äytelgän. Tatar cämägätçelege oyışmaları wäkilläreneñ tatar gäzite belän mäxkämäläşüye däwam itä.Ufa tatarları milli-mädäni moxtäriäte räise Zahir Xäkimov üzen pıçratqan mäqälä öçen “Qızıl tañ“ gäziten mäxkämägä birgän ide.Ul ağımdağı yılnıñ cäyendä Ufanıñ Sowet rayonı mäxkämäse tarafınnan qaralıp , Xäkimov faydasına qarar çığardı , läkin gäzit anıñ belän rizalaşmıy respubliknıñ yuğarı mäxkämäsenä birde.Yuğarı mäxkämä anı qabat Sowet rayonına qaytardı.Älege eş 23nçe noyäber qaralıp , qabat Xäkimov faydasına qarar çığardı.Qararda “Qızıl tañ“da ul yazmanıñ döres tügellegen faşlap mäqälä birergä häm kürelgän ruxıy zıyan öçen Xäkimovqa 10000 sum aqça tülätergä dielgän.Cäyen uzğan mäxkämä ruxi zıyan külämen 50000 sum dip bäyälägän ide.

Mönir Wafin , Ufa