Accessibility links

җомга, 9 декабрь 2016, Казан вакыты 14:44

Başqortstan tatarlarınıñ Mäskäwdäge qorıltayında qatnaşuçılar yulğa çıqtı


Başqortstan tatarlarınıñ 27 noyäberdä Mäskäwdä ütäçäk qorıltayı delegatları 25 noyäber könne töş waqıtında autobuslarğa utırıp yıraq yulğa çıqtı. Mäskäwdäge zur cıyınğa Başqortstannıñ qırıqqa yaqın rayonınnan häm Ufadan saylanğan 150 wäkil bara. Başqortstanda çärşämbe könneñ kiçendä ük başlanğan köçle qar buranı atnaqiç könne dä däwam itte häm barlıq zur yullarda da maşinalar öçen küp qıyınlıqlar tudırdı. Bu xäl yıraq rayonnardağı deleğätlarnıñ Ufağa kilüenä qomaçawlıq tudırır digän qurqular da bulğan ide. Ämma barlıq keşe dä kilep citte häm Ufadağı Urıs däwlät drama teatrı binası qarşında cıyılışıp betkäç, autobuslarda yulğa çıqtılar. Autobuslar quzğalır aldınnan, bez deleğätlarnıñ qayberläre belän söyläşep aldıq. Başqortstan Tatar kongressı Başqarma komitetı äğzası, tanılğan kompozitor Alik Loqmanov fikerençä, Başqortstan citäkçelege älege qorıltaynı Ufada ütkärergä mömkinlek birmiçä, çirattağı xatasın eşläde. «Älbättä, Mäskäwdäge qorıltaydan soñ da respublika tatar cämägätçelek oyışmalarına qarşı höcümnär köçäyep kitärgä mömkin. Ämma moña qarap qına Başqortstan tatarları mänfägätlären yaqlawdan baş tartıp bulmıy iç inde», – dide Alik Loqmanov. Başqortstan tatarları qorıltayında qatnaşuçılar yulğa çıqqan könne, yağni 25 noyäberdä täwdä Çallı şähärendä, annan soñ kiçen Qazanda tuqtap mitinglar da ütkärergä tieş. Mitinglar dimäktän. Mäğlüm buluınça, qorıltay deleğätları Mäskäwgä barğanda Tübän Novğorod şähärendä dä tuqtap, anda da uram cıyını oyıştırırğa tieş ide. Ul mitingnı ütkärü öçen un kön elek ük räsmi rizalıq ta alınğan bulğan. Ämma çärşämbe könne Tübän Novğorod şähäre xaqimiätennän bötenläy başqa törle xäbär kilep töşkän: bu mitingnı ütkärügä röxsät birelmäyäçäk ikän. Qorıltaynı oyıştıru qomitetı äğzaları fikerençä, älege xäldä Başqortstan citäkçeläreneñ möräcäğäte rol' uynağan bulırğa tieş. Şulay itep, älegä Tübän Novğorodtağı mitingnı ütü – ütmäwe soraw astında. Başqortstan tatarlarınıñ Mäskäwdäge qorıltayı ber töp mäsäläne – Başqortstan Tatar milli – mädäni moxtäriäten oyıştıru mäsäläsen qarayaçaq. Anda qabul iteläçäk qararlar häm doqumentlarnıñ ölgeläre xäzerdän ük äzerlänä inde. Tatar oyışmaları liderları belderüençä, Başqortstan Tatar milli – mädäni moxtäriäten oyıştıru, qayberäwlär äytüençä, respublikta tartqalaş tudıru öçen tügel, ä barı tik respublikta yäşäwçe tatarlarnıñ milli – mädäni mänfägätlären näticäleräk yaqlaw öçen genä tözelä.

Fänis Fätxi, Ufa

XS
SM
MD
LG