Accessibility links

Кайнар хәбәр

Ukrainadağı säyäsi krizis Rusiäneñ Quşma Ştatlar belän mönäsäbätlärenä zian kiterä ala


İnde mäğlüm bulğança, Rusiä prezidentı Vladimir Putin Viktor Yanukoviçkä anıñ yaña prezident itep iğlan itelüe uñayınnan qotlaw cibärde. Yevropa häm Quşma Ştatlar isä ikençe tur tawış birüneñ tupas bozular belän ütüe xaqında belderä häm anıñ näticälären tanımayaçağın äytä. Ukraina şulay itep, Könbatış, bigräk tä Amerika Quşma Ştatları belän Rusiä arasında yaña kierenkelek çığuğa säbäp bula ala.

Washingtonnıñ Viktor Yanukoviçne yaña prezident itep tanımayaçağı inde çärşämbe kiçen ük mäğlüm buldı, Üzäk saylaw komissiäse Kievtä saylawlarnıñ şikle näticälären iğlan itügä Quşma Ştatlarnıñ däwlät sekretare Colin Powell üz ileneñ Yanukoviçne tanıy almawın xäbär itte.

Audio, Colin Powell

"Bez bu näticäne qanuni dip qabul itä almıybız, çönki alar xalıqara standartlarğa turı kilmi, çönki küpsanlı xärämläşülär häm bozular turındağı xäbärlär äle haman da tikşerelmäde" dip añlata Washingtonnıñ ukrain saylawlarına mönäsäbäten Colin Powell. Amerikan däwlät sekretare şulay uq, Ukraina citäkçeläre öçen xäzer, üzläreneñ demokratiä yağında bulu-bulmawın xäl itü waqıtı çitte dip belderde. Powell, Rusiäneñ açıqtan-açıq Viktor Yanukoviçne yaqlawı turındağı sorawğa cawap birüdän qaçsa da, anıñ xäzerge ukrain xakimiaten kisätüe öleşçä Mäskäwgä dä yünälderelgän bula ala. Rusiäneñ Könbatış belän, ayırım alğanda, Amerika Quşma Ştatları belän araları soñğı aylarda bolay da şäptän tügel, Ukrainadağı xällär arqasında alarnıñ tağın da naçarayuı mömkin. Mäskäwdäge AQŞ häm Kanada institutınıñ mödir urınbasarı Viktor Kremençuk, Rusiä citäkçeläreneñ xäzerge prezident Kuçmanı häm anıñ warisı sanalğan Yanukoviçne yaqlawı ilneñ Washington belän mönäsäbätlärenä zian kiteräçäk dip isäpli.

Audio, Viktor Kremençuk

"Monıñ sözemtäläre, älbättä, bulaçaq, alar küpmeder däräcädä Mäskäwneñ aldağı könnärdä nindi pozitsiä aluına bäyle bulaçaq, tup xäzer bezneñ yaqta. Amerikannar üz qaraşın açıq itep belderde häm üzläreneñ saylaw näticälären nigä tanımağanın da añlatıp birde. Xäzer inde Mäskäw dä üz qaraşın cämäğätçelekkä açıq itep belderergä tieş" di Kremençuk. Prezident Putin monı atnakiç öleşçä eşläde - Yevropa Berlege citäkçeläre belän oçraşuında ul Ukrainadağı wäzğiatkä kiñräk tuqtaldı, bu xaqta sez soñraq işetersez. Ä inde Kievtäge xakimiat krizisınıñ Mäskäw belän Washington arasındağı mönäsäbätlärgä tä''sir yasawına qaytıp, Mäskäwdäge Xalıqara mönäsäbätlär institutınıñ Yevropa wä Amerika tikşerenüläre bülegennän Vladimir Peçatnov fikeren kiterergä bula.

Audio, Vladimir Peçatnov

"Ukrainadağı krizisnıñ bezneñ ikeyaqlı mönäsäbätlärgä ğomumi yoğıntısına kilgändä, bu, älbättä, qatmarlandıra torğan ber närsä, xäzerge waqıtta bez Ukrainadağı xällär uñayınnan üzenä kürä ber sınaw ütäbez. Bu il bezgä, amerikannarğa qarağanda, küpkä möhimräk, läkin min, Rusiä ayırım ber nämzät çiñep çığuı öçen teläsä närsä eşlärgä äzer bulaçaq dip äytmäs idem, Rusiägä andağı wäzğiatneñ qanuni qısalarda qaluı kiräk. Ukrainadağı täräqqiatneñ niçek däwam itüe öçen Rusiä dä, Quşma Ştatlar da cawaplı, biredä kilep tuğan wäzğiat öçen Rusiäneñ genä tügel, Amerikanıñ da cawaplı buluı mäs''äläsen kütärergä mömkin" di Mäskäw belgeçe Vladimir Peçatnov.

Kärim Kamal
XS
SM
MD
LG