Accessibility links

җомга, 9 декабрь 2016, Казан вакыты 08:51

Aydar Ğalimovnıñ “Därwiş yulı” konsertı uzdı.


“Uniks” konsertlar zalında Aydar Ğalimovnıñ konsertları başlandı. İke bülektän torğan yaña programma “Därwiş yulı” dip atala. Zal şığrım tulı ide. Qazan şähärendä, älbättä, tamaşaçı bik talımlı. Şulay buluğa qaramastan, Aydarnıñ moñlı tawışın sağınğan qazanlılar anıñ çığışın alqışlarğa häm çäçäklärgä kümdelär. Tamaşaçılar arasında cırçılar Xäniä Färxi, Ğabdelfät Safin, Röstäm Zakirovlar bar ide. Şulay uq Aydarnıñ muzıka buyınça möğallime Miñğol Ğaliev ta kilgän ide. Aydar 15 yıl buyı inde üzeneñ muzıkal' törkemen citäkli. Ä menä soñğı konsert kilüennän inde ike yıl waqıt uzıp ta kitkän. Ssenariy buyınça, konsert barışında Aydar, keşelär maturlıqqa omtılğanğa kürä äkiät uylap çığarğannardır,- digän fiker äytep, törki xalıqlarınıñ küñelenä xuş kilgän şärıq tormışın çağıldırğan mizgellärne tamaşaçığa videofil'm aşa kürsätä. Başqortstannıñ häm artistlarnıñ säyäxät itkän cirlärneñ matur tabiğät küreneşläre konsert barışında säxnädäge ekranda kürsätelä Ural Räşitov köenä Varis Akbaşev süzläre. Ä konsert barışında Aydar Ğalimov “Qazan yegetläre”cır kvartetına quşılıp ta cırladı .Repertuarına rusça cır da kertkän, ispan xalqınıñ mädäniäten xäterlätkän “Karmen”rolenä dä zamança sulış birgän. Salix Säydäşewnıñ “Ädrän diñgeze” cırın Aydar aña ğına xas bulğan tübän yışlıqtağı köçle tawışı belän başqardı. Fälästin yegete Al'- Aşqar Basem Sadki ud muzıka qoralında köylär uynap tamaşaçını şaqqattırdı. Ufa , ğomumän Başqortstan tatar estradası yoldızlarınıñ oyası bulıp tora. Xämdünä Timerğaliewa, Xäniä Färxi, Salawat Fätxetdinov, Ramil Mindiär, Gölnara Timercanova häm başqa biek küplär Qazanğa kilep, sänğät'tä zur ciñülärgä ireştelär. Başqortstanda qalğannarı da az tügel. Alarnıñ härqaysınıñ üz yazmışı, üz yulı. Aydar Ğalimov şular arasında iñ buldıqlısı, häm sälätlelärdän. Anıñ konsert programmasına kergän cırlarnıñ alıp barular tatar häm başqort tellärendä yañğırawı, konsertlarnıñ baylığı traditsiägä äylängän ide. Rejisserı Rifqät İsrafilov,häm baletmeysterı Oleg Nikolaev tarafınnan quyılğan “Därwiş yulı” programması da üzençälekle, häm professional' yaqtan osta eşlängän . Konserttan soñ cırçı belän söyläşkän waqıtta älbättä, küptän tügel genä Ufada faciğäle wafat bulğan sänğät keşese , cırçı- Vener Mostafin turında min soraşmıyça buldıra almadım. Küplär öçen zur yara bulğan bu waqiğa , Aydar öçen dä bik zur yuğaltu bulğan. Ul Vener Mostafin turında menä närsä dide: “Vener şäp yeget ide, talantlı tıynaq, yärdämçel ide. Anı belä torğan keşe bularaq, min bik tirän qayğırıp , bu yuğaltunı zur yuğaltu itep qabul itäm. Nindider ber millät wäkilen yuğaltu ğına dip tügel , ä talantlı şäxes bularaq başqortstan xalıqlarınıñ barısı öçen yanıp -köep yäşägän alar öçen üzeneñ ğömeren bağışlağan keşe ul, Vener ”,-dide Aydar Ğalimov. Aydar bu waqiğanıñ säbäpläre turında söylärgä kiräk tapmadı. Ämma anıñ küñele belän bu oçraqnı awır kiçerüe sizelä ide.

Azatlıq radiosı Mälikä Basıyr, Qazan.

XS
SM
MD
LG