Accessibility links

сишәмбе, 6 декабрь 2016, Казан вакыты 15:09

Greenpeace Başqortstandağı qanun bozular xaqında kisätä


Greenpeace xalıqara oyışmasınıñ Rusiä wäkilçelege bu atnakiçtä Berläşkän millätlär oyışmasınıñ sänägät üseşe buyınça oyışması YüNİDOnıñ generäl direktorı Mağärinos äfändegä möräcägät belän çıqtı. Ul möräcägättä YüNİDO oyışmasınıñ Başqortstandağı Yomağuca susaqlağıçın tözüdä qatnaşuına räsmi añlatma birüye sorala. Rusiä Greenpeace'ı wäkilläre fikerençä, Yomağuca susaqlağıçın tözü Rusiä qanunnarın tupas bozıp alıp barıla. Älege zur qolaçlı tözeleş menä niçä yıllar inde Başqortstannıñ iñ güzäl tabiğätle urınında – «Başqortstan» däwlät parqı bilämälärendä tuqtawsız däwam itä. – Biredä «Qızıl kitap»qa kertelgän cänleklärneñ 14 töre yäşi, – dip äytelä Grinpisnıñ möräcäğätendä. – Şulay uq bu töbäktä 100 dän artıq tördäge siräk oçrawçı üsemleklär üsä, kiñ bilgele Börcän qortları da şuşında ğına. Xalıqara ekoloğiä oyışması wäkilläre belderüençä, Könyäk Uraldağı tawlı urmannarda üsüçe ılıslı häm başqa zatlı ağaçlarnı uñlı – sullı kisü arqasında kiterelgän zıyan ğına da millionnarça dollar belän isäplänä. Rusiä Greenpeace'ı ekspertlarınıñ berse Mixäil Kreyndlin süzlärençä, Başqortstan xaqimiätläre Yomağuca susaqlağıçı tözeleşeneñ zıyansız ikänlegenä YüNİDO oyışmasın da ışandırıp, älege proyıqtnı tormışqa aşırıp betep bara. Xäzer inde tirä – yaq moxitkä zur zıyan kiterüçe şuşı giğant tözeleş öçen cawaplılıqnı, öleşçä genä bulsa da, üz östennän töşerü öçen, Başqortstan citäkçeläre «bu eşkä YüNESQO oyışması da, Grinpis ta, başqa xalıqara oyışmalar da cälep itelde», dip belderä. «Läkin bu belderü kiñ cämägätçelekkä yalğan mäğlümat birü bulıp tora», – di Kreyndlin äfände. Başqortstannıñ qayber qıyu ekoloğları da Yomağuca susaqlağıçı tözeleşenä qarşı çığışlar yasap qarağan ide. Ämma alarnıñ fikerläre sanğa suğılmadı. Tanılğan ekoloğ Boris Pawlov şul köräşçelär arasında bügen dä üz süzen kisterep äytüçe belgeç. Greenpeace oyışmasınıñ iñ soñğı möräcäğätenä bäyle «Azatlıq» radiosına üz fikerlären citkerde ul. (audio) Başqortstandağı ataqlı ekoloğ, Tabiğätne saqlaw Bötenrusiä cämğıyate Üzäk şurası äğzası Boris Pawlovnıñ näticäse turı häm qatğıy: älege köndä Başqortstan citäkçeläre Yomağuca susaqlağıçı häm anda gidroelektrostansiä tözeleşe xaqında bar dönyağa maqtanıp söyli. Ä anıñ açı cimeşlären, tabiğätkä kiteräçäk zıyanın kiläçäk buınnar tatıyaçaq. Boris Pawlov tağın ber mäğlümat birde. Yomağuca susaqlağıçın qanunnarnı bozıp tözü säbäple, YüNESCOnıñ maxsus Komitetı Könyäk Uralnı Bötendönya däräcäsendäge miras bulırlıq töbäklär isemlegenä kertü mäsäläsen qarawdan baş tartqan.

XS
SM
MD
LG