Accessibility links

шимбә, 10 декабрь 2016, Казан вакыты 02:09

Tatarstannıñ Uraldağı daimi wäkile Rawil'' Bikbov küp törle oçraşular ütkärde


Çirattağı yaldan çıqqannan soñ, Tatarstannıñ Uraldağı daimi wäkile Rawil' Bikbov küp kenä eşlekle oçraşular ütkärde.

Uzğan atnada Qazannan şähär xakimiäte başlığı urınbasarı Mansur Näqip ulı Xafizov kilgän ide. Oçraşu waqıtında “Qazan-Yekaterinburg – yaña meñyıllıqqa küper” proyektın tormışqa aşıru buyınça törle yullar qaraldı. Qazanğa yullar tözü öçen granitlı maxsus waq taş cibärü variantları tikşerelde. Qunaqnı şulay uq Uraltransmaş berläşmäse produktsiäse dä qızıqsındırdı. Şulay itep, oçraşu waqıtında Qazan belän Yekaterinburg arasındağı eşlekle mönäsäbätlärneñ tögäl yünäleşläre bilgelände.

Tatarstannıñ Uraldağı daimi wäkile Rawil' Bikbov ütkärgän citdi oçraşularnıñ berse Sverdlov ölkäse xökümäteneñ keşe xoquqların saqlaw buyınça wäqälätle wäkile Tat'yana Merzlyakovanı qabul itü buldı.

Oçraşu waqıtında süz tormışnıñ barlıq aspektlarına da qağılıp ütte. Sverdlov ölkäsendä yäşäwçe tatar xalqınıñ küp öleşe tuğan telne öyränä almawı, anıñ öçen şartlar tudırılmawı, bu xälneñ säbäpläre turında häm bu mä’säläneñ keşe xoquqların yaqlaw qanunnarın bozumı, yuqmı ikänlege turında fiker alışındı. Süz tatar awıllarındağı küp kenä problemalarğa, mäsälän, Ufa Şigerendä älegä qädär mäktäp tözeleşe başlanmawğa, Äräkäy awılınıñ klubsız yäşäwenä, häm başqa küp kenä mä’sälälärgä qağılıp ütte. Oçraşu waqıtında ike yaq ta kiläçäktä bergäläşep, tığız elemtädä eşlärgä teläk belderdelär.

Küptän tügel daimi wäkillektä Federal' kosmos agentlığı qaramağında eşlägän Miass däwlät maşina tözü zavodınıñ general' direktorı bulıp kitte. Älege zavod nefteximiä tarmağı öçen unikal' citeşterü cihazları çığaruı belän mäğlüm. Oçraşu waqıtında süz Tatarstan respublikası belän üzara mönäsäbätlärgä qağılıp ütte, moña qädär eşlängän eşlärgä näticä yasaldı. Monnan tış, Çiläbe ölkäsendä yäşäwçe tatarlarnıñ milli tormışı, ayırım alğanda, “Milli televidenie tapşıruların Ural tatarlarına citkerü” programmasın tormışqa aşıru yulları, tatar ictimaği oyışmaları belän mönäsäbätlärne nığıtu turında da süz bardı.

TNV tapşıruların Sverdlov ölkäseneñ küp kenä şähärlärendä kabel' televideniese yärdämendä här yortqa kertü eşe bik uñışlı bara. Yekaterinburgtan yıraq bulmağan Yuğarı Pışma, Berezovskiy, Pervoural'ski, Revda kebek şähärlärdän tış, ölkäneñ tönyak okrugında da bu eş bik aktiv bara ikän. Bu turında Rawil' Bikbovqa küptän tügel bulıp uzğan oçraşu waqıtında Sverdlov ölkäseneñ tönyaq idärä okrugı citäkçese İvan-İvanoviç Grammatik xäbär itte. Anıñ äytüençä, TNV tapşıruların Krasnotur'inski şähärendä küptän qarıylar inde. Ä bu könnärdä Tübän Tagil şähärendä bu eş başlanıp kitkän. Bu köngä qädär biredä 5000 abonentnıñ yortına TNV kertelgän. İvan-İvanoviç äytüençä, yıl axırına qädär Tübän Tagilda yäşäwçelär Tatarstan tapşıruların tulısınça qarıy alır. Ä inde Qazannıñ meñyıllığına qädär, tatar biznesmennarı yärdäme belän, başqa şähärlärdä dä bu proyektnı tormışqa aşıru mömkinlege bulır digän ömet bar.

İvan-Ivanoviç, üze rus keşese bulsa da, tatarça bik äybät söyläşä belä. Daimi wäkillek binasında oçraşu waqıtında da söyläşü tatar telendä bardı.

Böyek Ciñüneñ 60 yıllığına äzerlek yözennän, Tatarstannıñ Uraldağı daimi wäkile Rawil' Bikbov Böyek Watan suğışı veteranı, Ciñüne Berlinda qarşı alğan, suğışta kürsätkän batırlıqları öçen küp törle orden-medal'lärgä layıq bulğan Orqıya apa Xäyerlievanı qabul itte. Çäy östäle artında anıñ xäl-äxwällären soraşıp, bik cılı äñgämä qorıldı. Orqıya apa onıtmawları öçen tuğan Tatarstanına, millättäşlärgä olı räxmätlär belderde.

Fäwiä Safiullina.

Yekaterinburg.

XS
SM
MD
LG