Accessibility links

шимбә, 10 декабрь 2016, Казан вакыты 08:07

Ukraina parlamentı ikençe tur prezident saylawlarınıñ näticäsen ğamäldän çığaru öçen tawış birde


Ukraina parlamentınıñ ğadättäntış utırışında bügen deputatlar prezident saylawlarınıñ näticälären ğamäldän çığaru öçen tawış birde. Köntärtibendä berdän ber mäs''älä – ildä uzğan prezident saylawlarınnan soñ tuğan kierenke wazğiät ide.

Oppozisiä namzäte Viktor Yuşçenko kierenkelekne çişü öçen yaña saylawlar ütkärüne täqdim itte. Anıñ tarafdarları inde 6nçı kön – saylaw näticälärenä protest belderep uram cıyınnarı uzdıra. Yuşçenkonıñ meñlägän tarafdarı uzğan töndä Kievnıñ bäysezlek mäydanında biede, Ukrainanıñ tanılğan pop cırçılarına quşılıp cırlardı, tönnären çatırlarda uzdırdı. İrtän alar parlament binası qarşına cıyıldı. Könçığıştağı Donetski şähärendä Yanukoviçnı yaqlap uramnarğa 150 meñgä yaqın keşe çıqtı. Kiçä Ukrainadağı kierenkelekne çişü yulların söyläşer öçen Kievqa xalıqara aradaşçılar cıyıldı. Yevropa Berlege tışqı säyäsäte başlığı Javier Solana, uzğan söyläşülärne kierenke ämma näticäle dip bäyäläde: "Namzätlär belän ayırım oçraşqanda – mönäsäbätlär cılı ide, bergä bulğanda – salqınça. Ämma ber säğat uzğaç – tınıçraq ide," dide Solana. Namzätlärneñ ikese dä ildä köç qullanu buldırmaw häm tınıçlıq saqlap qalu kiräklege mäs''äläsendä kileşte. Söyläşülärdä qatnaşqan Polşa prezidentı Aleksander Kwasniewski, oçraşu – yaxşı başlanğıç ide, ämma çişeleş äle yıraq, dip belderde. Söyläşü tämamlanğaç oppozisiä citäkçese Viktor Yuşçenko – krizistan çığunıñ berdän ber yulı – 12 dekaberdä qabat saylawlar ütkärü, dide. Parlament başlığı Volodimir Litvin da, Yevropa aradaşçıları da – tağın ber tapqır saylawlar ütkärüne xuplıy.

Bügen Ukraina parlamentı, 21nçe noyaberdä uzğan prezident saylawları näticäläre ğamäldän çığarıla, digän rezolüsiä qabul itte. Bu xaqta parlament başlığı Litvin belderde: "Tawış birüneñ küp sanlı xärämläşülär belän bilgelänüe häm saylawçılarnıñ telägen çağıldırmawı säbäple saylaw näticälären ğamäldän çığaru öçen tawış biräbez ... 255 deputat yaqladı, rezolüsiä qabul itelde," dide Litvin.

Rezolüsiädä şulay uq, Viktor Yanukoviçnı ciñüçe dip iğlan itkän Üzäk Saylaw Komissiäsenä ışanıçsızlıq belderelä. Bügenge tawış birü – saylaw näticälären tulısınça ğamäldän çığarunı añlatmıy, ämma hiçşiksez oppozisiäneñ uñışı dip bäyälänä. Ukraina yuğarı mäxkämäse saylawlardağı xärämläşülärne tikşerü turında oppozisiäneñ möräcäğäten düşämbe könne qarıyaçaq.
XS
SM
MD
LG