Accessibility links

Кайнар хәбәр

Ğiraq räsmiläre saylawlarnı kiçekterüne kire qaqtı


Ğiraqnıñ waqıtlı xökümäteneñ matbuğat wäkile Thaer al-Naqip häm Quşma Ştatlarnıñ Ğiraqtağı ilçese John Negroponte ikese dä – ğınwar ayında, bilgelengänçä, saylawlar uzdırıp bulır, dip belderde. Negroponte kötelmägändä Falluca şähärendä bulıp kitte. Premyer-ministr İyad Allawi'nıñ matbuğat wäkile isä, saylawlarnı kiçekterü – tawış birüdä kübräk keşe qatnaşuına kitermiäçäk, dide. Saylawlarnı kiçekterüne Ğiraq räsmiläre kire qaqtı. Ğiraq saylaw komissiäse, 17 oyışma, alar arasında 10 säyäsi partiäneñ, ildäge köç qullanu häm äzerlek bulmawı säbäple, saylawlarnı kiçekterü turındağı möräcäğäten tikşergän ide. Komissiä citäkçese Hussein Hendawi, Reuters mäğlümat agentlığına, komissiä üze genä saylawlarnı kiçekterü turında qarar qabul itä almıy, dip xäbär itte: "Üzäk Saylaw Komissiäsendä bez saylawlarnı waqıtında uzdıru mäs'äläsen tikşerdek, häm tawış birü aldan bilgelängänçä, 30 ğınwar könne ütäçäk, häm bez moña äzerlänäbez" dide Hendawi. Sönni ğaräplär citäkçese, şulay uq tawış birüne kiçekterüne yaqlağan Adnan Paçaçi – bu adım – barı tik waqıt otu öçen eşlänä, dip belderde. Ul arada ildä köç qullanu däwam itä. Kiçä Fallucada ike amerikan xärbie hälak bulğan, häm ber xärbi Bağdadnıñ tönyağında şartlap ülgän. Bağdadta şartlawlarda 3 keşe hälak bulğan.
XS
SM
MD
LG