Accessibility links

Кайнар хәбәр

Ukrainada protest çaraları: 7nçe kön


Kievnıñ bäysezlek mäydanında oppozisiä namzäte Viktor Yuşçenkonı yaqlap uram cıyınına çığuçılar sanı bügen dä kimemäde. Salqınaytuğa da qaramastan mäydanda käyef bäyrämçä, piketta qatnaşqan xalıq, oppozisiäne yaqlawçı Ukrainanıñ tanılğan muzıka törkemnären tıñlıy. Mäydandağı säxnägä bügen xristian din äxelläre çığıp yäkşämbe wäğäzen uqıdı.

Kiçä Ukraina parlamentı utırışında qatnaşqan 429 deputatnıñ 255şe – saylaw näticälären ğamäldän çığaru häm Yanukoviçnı prezident itep iğlan itkän Üzäk Saylaw Komissiäsenä ışanıçsızlıq belderüne yaqlap tawış birde. Yuğarı Radanıñ älege rezolüsiäse saylaw näticälären çınbarlıqta ğamäldän çığara almasa da – Yuşçenko tarafdarları arasında – tağın ber tapqır saylawlar uzdıru ömete arttı.

Qırımda da inde 5nçe kön rättän ike namzätne dä yaqlap uram cıyınnarı ütä. Bügen Aqmäçettä Yanukoviç tarafdarları piket oyıştırdı, qazaqlar 15 çatır urnaştırğan. Bu eştä alarğa qırım xökümäte häm ğadättäntış xällär ministrlığı yardäm itüe mäğlüm. Ämma Yanukoviç tarafdarları Qırımda küp tügel. Kiçä Aqmäçettä Yuşçenkonı yaqlap uram cıyını uzdı. Qırımda – Ukraina parlamentınıñ saylaw näticälären ğamäldän çığaru turındağı qararın xuplap qarşı alınğan. Bu xaqta bezgä Qırımdağı xäbärçebez Dilewer Osman söyläp birde. (audio)

İke yaq ta irtägä bulaçaq Ukraina yuğarı mäxkämäse utırışın kötä. Anda Yuşçenkonıñ saylaw näticälärenä protestı qaraçalaçaq.
XS
SM
MD
LG