Accessibility links

җомга, 9 декабрь 2016, Казан вакыты 04:54

Qazanda fatir xaqları arta


Bügen Qazan şähär sovetı deputatlarınıñ çirattağı sessiäse buldı. Sessiälär yış ütä ul anısı, ay sayın diärlek. Monısı nigä iğtibarğa layıq buldı soñ dip aptıramağız. Monda härberebezneñ kesäsenä suğa torğan mä’sälälär qaraldı. Yarar, monısı turında soñraq.

Sessiäne şähär merı, berük waqıtta deputatlarnıñ räise dä bulıp torğan Kamil İsxaqov açtı. Säğättän artıq Kamil äfände üzeneñ soñğı aralarda Putinnan, Rus pravoslav çirkäwennän alğan orden büläkläre belän tanıştırdı. Monnan tış, Qazannıñ bıyıl Rusiäneñ olimp dip atalğan konkursında Yıl şähäre dip iğlan itelüen bilgeläp ütte. Häm bu iğlan, alqışlar, belderülär säğättän artıq bardı. İnde sessiäneñ töp öleşenä kilgändä, anda şähärdä kommunal'' xezmät öçen tüläw mä’säläläre qaraldı. Duslar, bäyälär arta. Monısın xakimiät yäşerep tä kilmäde anısı. Läkin küpmegä- üzegez sanap qarıy alasız. Mäsälän, privatizatsiälängän ber bülmäle xruşçevqa öçen 2004 yılda 493 sum tülägän bulsağız, 2005 yılda 680 sum buluı kötelä. Ägär dä bu ber bülmäle kvartirda ber keşe yäşäsä. Yäğni bäyälär 50 protsent tiräse kütäreläçäk. Ägär ike bülmäle xruşçevqa bulsa häm anda ike keşe yäşäsä, 930 sum tüläyäçäkbez. Bu 2004 yıldağı 673 sum urınına. Qabatlap äytäm, bu privatizatsiälängän kvartir öçen.

Sessiä kön tärtibenä Qazannıñ büdjetın qabul itü dä qaralğan ide. Läkin monısı da 10 dekabergä qaldırıldı. Qayber tikşerep beteräse äyberlär qalğan dip añlattı Kamil İsxaqov. Şähärneñ Ustavın qabul itü şulay uq kiçekterelde. Şulay uq, cir salımmın tüläw mä’säläse qaraldı. Qazannan tuplanğan cir salımınıñ yözdän illese elek Tatarstan byudjetına kitä ide, xäzer isä ul tulısınça şähär xisabına tuplana. Şuña kürä östämä kergän aqçanı qayda, niçek qullanunı xäl itü kiräkter inde.

Ğomumän, bügen Qazan şähär sovetı deputatlarınıñ çirattağı sessiäse kön tärtibendä möhim mä’sälälär qaralğan bulsa da, alar sessiäneñ däwamı – 10 dekabergä kiçekterelä kilde.

Räfis Cämdixan, Qazan

XS
SM
MD
LG