Accessibility links

пәнҗешәмбе, 8 декабрь 2016, Казан вакыты 05:07

Mäskäwdä kompozitor Sara Sadıkova häm anıñ tormış iptäşe tanılğan rejisser Ğaziz Aydarskin istälegenä bağışlanğan oçraşu-kiçä bulıp uzdı


Bu oçraşunı Sara Sadıkova häm Ğaziz Aydarskinıñ qızı Alfiä Aydarskaya oyıştırğan ide. Häm ul oçraşuda Alfiä Aydarsqayanıñ “Pamyat serdsa”- “Yöräk xätere” kitabın täqdir itü dä buldı.Ul könne milli üzäktä tağı ber çara - Başqortstan tatarlarınıñ milli mädäni möxtäriät oyışu syezdı da planlaştırılganga kürä, tamaşaçılarnıñ küpçelege Başqortstan tatarları ide. Alar da bu oçraşuda qatnaşıp,tamşaçılarğa cır da muzıka da täqdim ittelär. Kiçäne Mäskäwneñ milli mädäni möxtäriät räise general polkovnik Räsim Aqçurin açıp cibärde. Teatr belgeçe Luara Şakircanova Ğäziz Aydarskinıñ tormış yulı turında söyläde. Annan soñ Ğaliäskär Qamal teatrı artistı Aydar Xafizov belän berlektä alar, Sara Sadıkova belän Ğaziz Aydarskinıñ xatların uqıdılar. Bu oçraşuda Kärim Tinçurin isemendäge, Ğaziz Aydarski nigez salğan teatrdan İlxamiä Mäxmütova da qatnaştı. Ul İldar Yuzievnıñ “Qır qazları“digän äsärennän özek uqıdı häm şul spektakl'dän Sara Sadıkovanıñ köyenä yazılğan “Qır qazları artınnan” digän cırnı başqardı. Bu oçraşuda cırlar da şiğerlär dä küp yañğıradı. Älfiä Aydarskaya, äniemneñ dä şiğerläre bar. Xäzerge waqıtta anıñ şiğerläre häm anıñ xaqında yazılğan şiğerlär illeläp cıyıldı inde, ul tizdän ber cıyıntıq bulıp çığaçaq dip belderde. Häm Sara Sadıkovanıñ ber şiğeren uqıdı. Şiğerlären şulay uq bu kiçädä qatnaşqan Qazan şağiräse El'mira Şärifullina da tamaşaçılarğa täqdim itte. Oçraşuda Tatarstanlılar küp qatnaştı. Tatarstannıñ Yäşel üzän rayonı mädäniät bülege citäkçese Ramil Göbäydullin üzlärendäge ber mäktäpkä Ğaziz Aydarski iseme bireläçägen dä xäbär itte. Häm Mäskäwneñ mädäni üzägenä büläklär tapşırdı. “Şähri Qazan” gazetasınıñ baş möxärrir urınbasarı Xämzä Bädretdinov ta Sara Sadıkova turında söylägännän soñ, milli üzäkkä büläk itep kitaplar tapşırdı. Ä inde Qazannıñ 4 tatar gimnaziäse direktorı İlxamiä Vaxitova .noyäber ayında berniçä yıl inde gimnaziädä Sara Sadıkova isemendäge festival' ütkänen, häm alğa taba ul festival’ne kiñräk itep ütkärergä planlaştıruların söyläde. Häm gimnaziädä Sara Sadıkova muzee da açıldı dip xäbär itte.

Sara Sadıkova turındağı kitapnıñ möxärrire bulğan Rawil Raxmani üz isemennän dä Tatarstannıñ wäkälätle wäkillege isemennän dä qotlap çığış yasadı. Oçraşu bik qızıqlı häm eçtälekle ide. Oçraşudan soñ min Älfiä Aydarskaya belän bulğan äñgämädä ul, Ğaziz Aydarskinıñ Mäskäwdä häm Qazanda tatar teatrı oyıştıru turındağı eşçänlege xaqında söyläde. Alar tuğız yıl buyı Mäskäüdä xezmät itkännär. Häm Sara Sadıkova, Ğaziz Aydarskiğa bağışlanğan oçraşunıñ Mäskäwdä uzuı oçraqlı tügel, alarnıñ icatı Mäskäwdän başlanğan, dide.

Älfiä xanımnıñ äytkännärendä östäp, bezneñ söyläşügä Ğaliäskär Qamal isemendäge teatr artistı Aydar Xafizov ta quşıldı. Häm ul, Ğaziz Aydarski tatar rejisserlarınnan iñ uqımışlı, iñ äzerlängän rejisser bulğan. Çönki ul Stanislavskiynıñ uquçılarınnan belem alğan şäxes ide, dide. Ägär dä ul awırıp kitep wafat bulmağan bulsa, bälki Mäskäwdä tatar teatr da yäşägän bulır ide äle, dip belderde Aydar Xafizov.

Yazmanı “Azatlıq” radiosı öçen Näzifä Kärimova äzerläde.

XS
SM
MD
LG