30 noyäber könne Tatarstannıñ İminlek Şurasınıñ çirattağı utırışı uzdı. Anda respublikada korrupsiägä qarşı strategiäne tikşerelü däwam itte. Utırışta qatnaşqan Tatarstan prezidentı Mintimer Şäymiev älege köräşneñ bik möhim buluı turında äytte, ä korrupsiägä qarşı strategiäne äzerläwçe komissiä räise Rawil Moratov respublika Rusiädä korrupsiä az bulğan töbäklärgä kerüe xaqında söyläde. Utırışnıñ axırında Mäskäw belgeçläre tözegän strategiä nigezdä qabul itelde.
Qazanda 1 dekaberdän başlana torğan fizik mömkinlekläre çiklängän keşelär unkönlegenä äzerlek qızu bara. Älege dekada qısalarında respublikada yäşäwçe 65 meñnän artıq bu keşelärgä ğädättägeçä ayıruçı iğtibar kürsäteläçäk. Alarğa yärdäm kürsätep, tege yäki bu xezmätkä taşlamalar yasayaçaqlar, ä fizik mömkinçelekläre çiklängän tatarstanlılar turında syujetlar Tatarstannıñ televidenie häm radiokanallarınnan ayıruça yış täqdim iteläçäk. Respublikada eşläp kilüçe telekanallarğa tizdän yaña kanal da östälergä mömkin, dip xäbär itä Tatar-inform agentlığı. Älegä 12 yışlıqtağı kanal sınaw räweşendä genä eşli başlağan. Läkin bar cihazlar da quyılıp betkäç, bu yışlıqta eşlärgä teläwçe kompaniägä bäyge iğlan iteläçäk. Şulay itep, Tatarstanda yaqın arada yaña telekanal eşli başlarğa mömkin.
Ä menä älegä bulğannarı sişämbe könne 29 noyäberdä uzğan Tatneft’ şirkäteneñ Direktorlar Şurası utırışı xaqında söyläde. Anda äytelgän mäğlümätlärgä qarağanda, Tatneft’ 2004 yılnıñ 9 ayında 19 million tonna neft’ çığarğan. Bu uzğan yılnıñ şuşı uq waqıtı belän çağıştırğanda 2 protsentqa kübräk ikän. Şulay uq utırışta şirkätneñ Rusiä häm Tatarstan salımçıları aldında burıçları bulmawı xaqında da iğlan itelde. Soñğı aralarda YUKOS, Sibneft’ häm başqa Rusiäneñ neft’ çığaruçı kompaniäläre belän berrättän Tatneft’neñ dä uzğan yıllar öçen tülänmägän salımnarı qalğan, digän süzlär işetelä başladı. Şirkät wäkilläreneñ bezneñ xökümät aldında äcätlärebez yuq diüe belgeçlärne, ä iñ möhime, salımçılarnı, ışandırırmı, yuqmı – älegä bilgesez. Ä menä Tatneft’neñ Törkiäneñ Tupras neft’ eşkärtü şirkäten satıp ala almayaçağı inde tögäl bilgelände. Bu xaqta uzğan atna axırında Törkiäneñ Yuğarı mäxkämäse utırışınnan soñ bilgele buldı. İsegezgä töşerep ütik, Törkiä neft’ eşkärtü tarmağınıñ 87 protsentın biläp toruçı Tuprasnı Tatarstan şirkäte ağımdağı yılnıñ fevral’ ayında satıp alğan ide. Döresräge, Tatneft’ kompaniäneñ 66 protsentın aldı. Läkin Törkiäneñ profsoyuzlar berlege älege satunı qanunsız dip belderde häm may ayında Anqara mäxkämäsendä ciñügä ireşte. Berniçä ay däwamında Törkiäneñ törle däräcädäge mäxkämälärendä qaralğannan soñ, Tupras kompaniäseneñ qanunsız satıluı isbatlandı. Şulay itep, Tatneft’ Törkiä neft’ eşkärtü kompaniäsennän qorı qaldı.
Gölnaz İlgizär
