Accessibility links

дүшәмбе, 5 декабрь 2016, Казан вакыты 07:35

25-26 noyäber könnärendä Barnawl şähärendä Altay kraenda yäşäwçe tatarlarnıñ häm qazaxlarnıñ 1-nçe qorıltayı bulıp uzdı


Anıñ eşendä 100 gä yaqın delegat häm qunaq qatnaştı. Kray häm şähär xakimiätläre wäkilläre dä buldılar. Qorıltayda qatnaşuçılar Altay kraenıñ törle şähärlärennän häm rayonnarınnan, Qazaxstan cömhüriäteneñ Pawlodar, Semipalptinski, Ust'-Kamenogorski şähärlärennän, Rusiäneñ Seber yağı şähärlärennän - Tomskidan, Novosibirskidan, Omskidan, Yekateringburgtan häm Tatarstannan buldılar.

Älege qorıltayda qatnaşqan Omski tatar milli mädäni möxtariäte räise urınbasarı Xälil äfände Sadıykov Omskiğa qaytqannan soñ möxtariät idaräseneñ düşämbe könne uzğan kiñäytelgän utırışında Barnawlda uzğan qorıltaynıñ eşe turında bäyän itte. Anıñ süzlärençä Altay kraenda yäşäwçe tatarlarnıñ häm qazaxlarnıñ bu berençe qorıltayı Barnawl şähäreneñ tatar mädäniät üzäge häm qazaxlarnıñ “Ata-mura” dip isemlängän mädäniät üzäge initsiativaları belän ütkärelgän. Oyıştıru eşlärendä “Dulqın” tatar mädäniät üzäge dä qatnaşqan. Totılğan çığımnarnıñ barsın da tatar eşmäkäre – Änwär äfände Äminov kütärgän

“ Qorıltaynıñ töp maqsatı - Altay kraenda yäşäwçe tatarlarnıñ häm qazaxlarnıñ milli üseş konsepsiälären häm milli mädäni möxtariätlären tözü buldı”, - di Xälil äfände. Bu sorawlar qorıltay barışında uzğan “Küp millätle Altay” dip isemlängän tügäräk östäl söyläşüendä centekläp tikşerelgän. Üz töbäklärendäge milli xäräkätneñ torışı, belän Novosibirskidan, Omskidan, Konçıygıyş Qazaxstannan kilgän qunaqlar tanıştırğannar üzläreneñ eş täcribäläre belän urtaqlaşqannar.

Qazan qunaqları - Tatarstan diniä näzaräteneñ bülek mödire Rifxat' xäzrät Nasıybullin häm Bötendon'ya tatar kongressı başqarma komitetı äğzası Mars äfände Tukaev qorıltay qunaqlarına Tatarstan sälämen tapşırğannar, kitaplar büläk itkännär.

Altay kraendağı tatar häm qazax mädäni üzäkläreneñ bügenge köndäge eşçänlege turında üzäk citäkçeläre Zaqir äfände Latıypov häm Xäyercan äfände Dusembekov söylägän. Qorıltayda bu o yışmalarnıñ problemaları kütärelgän, alarnı çişü yulları qaralğan. Annan tış oyışmalarnıñ aldağı eş plannarı belän tanışu bulğan, alarnı tormışqa aşıru buyınça fiker alışu barğan.

Qorıltaynıñ ikençe könne uzğan utırışında Altayda yäşäwçe tatarlarnıñ häm qazaxlarnıñ milli mädäni möxtariätların tözü turında qarar qabul itelgän, programmalar tözü östendä eş başlanğan. “Tözeläçäk möxtariätlärneñ töp eş yunäleşläre, başqalarnıqı kebek, milli mädäniätlärne üsterü, ğöref-ğadätlärne torğızu, xalıqta, ayıruça yäş buında milli üzañ tärbiäläw, islam dine nigezendä äxlaqi tärbiä birü kebek prinsiplarğa tayanıp alıp barılırğa tieş” - digän qarar da qabul itelgän anda.

Saniä Mirxaleewa. Azatlıq radiosı. Omski .

XS
SM
MD
LG