Accessibility links

чәршәмбе, 7 декабрь 2016, Казан вакыты 15:40

Udmurtiädä Riza Şäfineñ yaña şiğerlär cıyıntığı dönya kürde


Udmurtiäneñ Votkinsk şähärendä yäşäp icat itüçe tatar şağire Riza Şäfineñ şuşı könnärdä yaña şiğerlär kitabı dönya kürde. Avtor anı «Tawlarım iñendä tawlar» dip atağan.

Riza ağa üz ğömerendä küpne kürgän, küpne kiçergän. Ğorur—mäğrur Ural tawları qoçağına sıyınıp utırğan iskitkeç şiğri täbiğat'le Başqortstannıñ Ürge Qiğı awılında tuıp üskän. Uqıtuçı häm şağir bulu teläge anı Qazan däwlät pedagogiä institutınıñ tatar tele häm ädäbiät bülegenä kiterä. Tik bu xıyalın tormışqa aşırır öçen küp yıllar ütärgä turı kilä. Yazmış anı başqa yuldan kitärgä mäcbür itä: cугыш, annan soñ xärbi akademiä. Riza Zakir ulı Rossiäneñ törle töbäklärendäge zavodlarda xezmät itä, xärbi qoral buldıru eşenä başı belän çuma. Riza ağanıñ 30 yıl ğömere Udmurtiäneñ Votkinsk şähärendä urnaşqan maşina tözü zavodında raketalarnıñ quätle törlären buldıruğa bağışlana. Bu yıllarda Riza ağağa şiğerlär yazu öçen waqıt qalmıy, bik siräk kenä şiğerlär tua. Çın—çınlap Riza Şäfi şiğriätkä otstavkağa çıqqaç qına birelä. Riza ağağa inde siksännän artıq. Soñğı yıllarda avtor distägä yaqın kitap bastırıp çığardı, soñğı yıllarda ğına ul Tatarstan Yazuçılar berlege äğzası itep qabul itelde. Riza Şäfi

«…Kötä beläm min üz öleşem, çiratımnı,

Başqalar xaqına kermim ärsezlänep…» digän yullarnı bälki näq şunı isendä totıp yazğandır. «Tawlarım iñendä tawlar» isemle kitabın xalıqqa täqdim itü kiçäsendä dä bolarnıñ barısın da isäpkä alıp, Çallı şähär yazuçılar berlege räise Waxit İmamov bolay dide.

—audio—

İjaw şähäreneñ timeryulçılar mädäniät yortında oyıştırılğan kiçägä avtor sälämätlege bulmaw säbäple, kilä almadı. Ämmä säxnädän çığış yasawçılar da, alar Tatarstan Yazuçılar berlege räiseneñ icat eşläre buyınça urınbasarı Şähinur Mostafin, alda äytep uzğan Waxit İmamov, Tatarstannıñ Ägerce töbägennän qälämdäşläre, Votkinsk häm İjawdan millättäşläre belderüençä, bu alay uq sizelmäsä dä, Riza ağanıñ salmaq qına tawışın işetüe kiçäneñ yämen artırır, küñellärdä cılıtır ide dip assızıqladılar. Riza ağağa iärep, aña bağışlap yazılğan şiğerlär dä, küp yañğıradı säxnädän. Alarnıñ berse — İbrahim Biektawlı, ikençese yäş millättäşebez El'mira Niğmätcan yazğan

—audio—

Ä qup kenä şiğerlär avtorı Ğimran Safin Riza Şäfi turında mondıy fikerlären belderde.

—audio—

Äye, auditoriälärgä cıyıp, leksiälär uqımağan, ämmä Riza ağanıñ icatı alarnıñ härberse öçen ürnäk. Uz xalqıña xezmät itü, teleñne yaratu, milläteñ belän ğorurlanu, tuğan cireñä dan cırlaw, täbiğateñ belän xozurlanu, izgelıq qılu — yaña cıyentıykqa kergän här biş bülegendä dä äytep ütkän temalarğa küñeldä uyılıp qalırlıq yullar bar.

Xämidä Ğayfullina, «Azatlıq» radiosı, İjaw.

XS
SM
MD
LG