Accessibility links

җомга, 9 декабрь 2016, Казан вакыты 05:02

Prezident Kuçma Mäskäwgä bara, Kievtä Yuğarı mäxkämä qararın kötälär


Ukrainadağı säyäsi krizis turında Rusiä prezidentı belän kiñäşläşü öçen ilneñ xäzerge citäkçese Leonid Kuçma pänceşämbedä Mäskäwgä kilde (barıp qayttı). Kievneñ üzendä isä yaqlar Yuğarı mäxkämäneñ ikençe turdağı xärämläşülär turındağı qararın kötä. Çärşämbedä xalıqara aradaşçılar qatnaşında uzğan söyläşülärdä krizistan çığu yulların näq menä mäxkämä qararınnan soñ bilgeläw xaqında kileşengän ide.

Pänceşämbe Ukraina başqalasında inde ikençe atna barğan säyäsi krizisnıñ beraz yomşara töşüenä ömetlänü belän başlandı. Çärşämbe kiçen Viktor Yuçenko häm Viktor Yanukoviç arasında berniçä xalıqara aradaşçı qatnaşında oçraşu uzdı, şuşı ike köndäş söyläşülär azağında soñğı könnärdä berençe märtäbä ber-bersenä qul birde, oçraşunıñ üzendä bu krizisnı xoquqi qısalarda xäl itü, şul maqsatta häm kilep tuğan wäzğiatkä qanuni bäyä birü öçen maxsus belgeçlär törkeme tözü xaqında kileşende. Şuşı "tügäräk östäl"neñ çirattağı utırışın inde, Ukraina Yuğarı mäxkämäse ikençe turdağı xärämläşülär turında üz qararın çığarğannan soñ cıyu xaqında da xäbär itelde. Şulay itep xäzer krizisnı xäl itüdä xälitkeç süz Yuğarı mäxkämädän kötelä. Çärşämbe oçraşuınnan soñ Bäysezlek mäydanındağı cıyın qarşına çıqqan Viktor Yuçenko mäxkämä qararı krizistan çığu yulın kürsätä ala dip belderde.

Audio, Viktor Yuçenko

"Bez zur tüzemsezlek belän Yuğarı mäxkämä qararın kötäbez. Ägär dä ul Ukrainanıñ Yuğarı radası qabul itkän säyäsi qararalar belän awazdaş bula ikän, bezgä Ukrainadağı krizisnı xäl itügä ber adım ğına qalaçaq" di oppozitsiä citäkçese Viktor Yuçenko. Mäğlüm bulğança, Ukraina parlamentı çärşämbedä Yuçenkonıñ köndäşe premyer-ministr Viktor Yanukoviç xökümätenä ışanmawın beldergän ide. Yanukoviç häm anı yaqlağan prezident Kuçma Yuğarı radanıñ şuşı qararın barı tik säyäsi ber ğämäl dip kenä bäyäli. Xökümätne eşennän barı tik prezident qına ala ala. Oppozitsiä isä xäzer maxsus "Xalıq ışanıçı" xökümäten tözüne alğa sörä, anıñ ikençe ber kürenekle wäkile Yuliä Timoşenko atnakiç, bez şul yaña xökümätne qoru maqsatında parlamentta yaña küpçelek oyıştıru eşen alıp barabız dip belderde. Saylaw näticäläre belän ni eşläw mäs''äläsendä dä oppozitsiä häm xäzerge xakimiat arasında tirän qarşılıq qala birä. Yuçenko tarafdarları barı tik ikençe turnı ğına qabatlaw kiräk dip isäpli, prezident Kuçma isä yaña saylawlar turında söyli. Şuşı qaraşın ul atnakiç Rusiä prezidentı Putin belän Mäskäwdä uzğan oçraşuında da qabatladı. Ukraina prezidentı oppozitsiä taläp itkän ikençe tur tawış birüne qabatlawnı prezident saylawlarınıñ öçençe turı dip bilgeli häm dönya tarixında andıy närsäneñ älegä bulğanı yuq dip belderä. Aziä illäre buylap säfärgä çığarğa cıyınğan Putin Leonid Kuçmanı "Vnukovo-2" hawa alanında kürep söyläşte, Ukraina prezidentı şunnan soñ kire Kievkä qayttı. Ul arada Yevropa parlamentı Ukrainadağı wäzğiat turında maxsus qarar qabul itep, anda küpsanlı xärämläşülär bulu säbäple ikençe tur tawış birü näticälären ğämäldän çığarunı häm xalıqara kontrol'' astında şul ikençe turnı äle bıyıl uq qabatlawnı yaqlap çıqtı. Yevroparlamentnıñ şuşı qararında, Ukrainada kilep tuğan wäzğiat öçen cawaplılıqnıñ şaqtıy öleşe Rusiädä dä yata dielä.

Kärim Kamal
XS
SM
MD
LG