Accessibility links

сишәмбе, 6 декабрь 2016, Казан вакыты 08:49

Sarıtaw ölkäsendä Başqortstan wäkilçelege açıldı


Soñğı öç-dürt ay eçendä Başqortstan Respublikası Rusiäneñ berniçä töbägendä üzeneñ daimi wäkilçeleklären buldırdı. Şular arasında Sarıtaw ölkäse dä bar. Sintäber ayında bu ölkädä dä wäkilçelek açu xaqında Başqortstan prezidentınıñ maxsus färmanı dönya kürgän ide. Ul färmanğa yaraşlı, daimi wäkilçelek citäkçese itep Sarıtaw ölkäsendäge kiñ bilgele tatar eşquarı häm cämägät eşleklese Kamil Äbläzovnıñ bilgelänüye dä äytelde ul çaqta. Menä xäzer şul wäkilçelekne räsmiläşterü, Kamil Äbläzovqa akkreditasiä birü tantanaları ütä. Başqortstannıñ räsmi wäkillege şuşı tantanalarda qatnaşu öçen Sarıtawğa kitte. Aldan xäbär itelüençä, Sarıtawdağı wäkilçelekne räsmi açu tantanası 3 dikäber könne ütärgä tieş ide. Bu şulay buldı da. Oçraşuda Sarıtaw ölkäse xaqimiäte wäkilläre dä qatnaşa häm ike töbäk arasındağı iqtisadi, sotsial xezmättäşlekne kiñäytü, üzara mädäni bağlanışlarnı arttıru turında söyläşülär alıp bara. Tatar eşquarı häm tanılğan cämägät eşleklese Kamil Äbläzov moñarçı da Tatarstan häm Başqortstan belän tığız elemtädä bulıp, tatar – başqort milli - mädäni oyışmalarına, sänğät ähellärenä gel matdi häm ruxi yärdäm kürsätep yäşägän ide. Xäzer inde anıñ şuşı eşçänlege däwlät däräcäsendä dä alıp barılaçaq. Şulay itep Başqortstan Rusiä töbäklärendä üzeneñ daimi wäkilçeleklären açunı däwam itä. Küptän tügel şundıy uq wäkilçeleklär Orenbur belän Çiläbe ölkälärendä dä räsmi açılğan ide.

XS
SM
MD
LG