Accessibility links

чәршәмбе, 7 декабрь 2016, Казан вакыты 21:28

Mäskäw ölkäsendäge millättäşlärebezne qotlarğa Qazan wäkilläre dä kitte


Şimbä könne Mäskäw ölkäse tatarları milli-mädäni moxtariäte tözelügä 5 yıl tuluğa bağışlanğan tantanalı utırışı uzaçaq. Ul Mäskäwdäge Assadullaev yortında bulaçaq. Anda qatnaşıp ölkädäge millättäşlärebezne qotlaw öçen comğa könne Qazannan da wäkillär kitte. Delegatsiä Tatar kongressı wäkilläre häm federal milli-mädäni moxtariät citäkçelegennän tora. Bötendönya Tatar kongressında da qunaqlar qarşılarğa äzerlänälär. 9-10 dekaber könnärendä Qazanda Başqarma komitetı häm tarmaq komissiäläreneñ çirattağı yıllıq yomğaq utırışları ütäçäk. Anda milli xäräkät wäkilläre häm Rusiä töbäklärendä eşläwçe tatar jurnalistları da çaqırılğan.

Tatarstan premyer-ministrı Röstäm Miñnexanov citäkçelegendäge respublika delegatsiäseneñ Hindstanğa räsmi säfäre däwam itä. 3 dekaberdän başlap tatarstanlılar Rusiä prezidentı Vladimir Putin delegatsiäse qısalarında eş alıp baraçaq. Çit illärgä respublikanıñ xökümät wäkilläre genä tügel, ä mädäniät ostaları da yöri. Alarğa yış qına säyäsätçelär öçen yabıq yullar da açıla. Mäsälän, Tatarstannıñ däwlät simfonik orkestrı şuşı arada ğına Tönyaq Koreyadan qayttı. Comğa könne Qazanğa qaytıp töşkän orkestrnıñ gastrol’läre 50 kön däwam itte. Koreyalılarğa Tatarstan muzıkantları şunıñ qädär oşağan ki, alar orkestr belän 5 yıl däwamında gastrol’lär oyıştıru turında kileşü tözegännär. Ä menä Könyaq Koreyanı kübräk respublikada citeşterelä torğan boralaqlar qızıqsındıra ikän. İL-76 oçqıçında bezdä yasalğan 3 ANSAT boralağı tizdän Koreyağa kitäçäk.

Comğa könne Qazannıñ ike rayonı üzläreneñ yubileyların bäyräm itte. Başqalanıñ Yaña Savin häm Aviatözeleş bistäläre oyışuğa bıyıl 10 yıl bulğan. Alar Qazannıñ elek Lenin isemen yörtkän rayonı ikegä bülengännän soñ oyışqan. Qışnıñ soñğı ayı – dekaber äle başlanıp qına kitsä dä, Qazanda inde Yaña yıl bäyrämenä äzerlek tä başlanıp kitte. Şähärneñ Yärminkälär mäydanında, Qazan milli-mädäni üzäge qarşında älege bäyräm uñayınnan quyıla torğan çırşığa urın äzerli başladılar. Bıyıl başqalada 70 çırşı mäydanı bulaçaq. Tatarstanda da 3 dekaber – xalıqara invalidlar könen bilgeläp üttelär. Xäyer, inde söylägänebezçä, respublikadağı 218 meñ fizik mömkinçelekläre çiklängän keşe 10 dekabergä qädär iğtibar üzägendä toraçaq. Uzğan atnada SPİD awıruı belän integüçelärne dä iskä töşerdelär. Bu 1 dekaber könne buldı. Ä andıy keşelärneñ sanı Tatarstanda arta bara. Ütkän 7 kön eçendä genä dä yaña 20 awıruçı terkälgän, dip xäbär itä Tatar-inform agentlığı.

Gölnaz İlgizär

XS
SM
MD
LG