Accessibility links

шимбә, 3 декабрь 2016, Казан вакыты 05:42

Ukraina Yuğarı Mäxkämäneñ qararın kötä. Täräqqiät bilgesez.


Ukrain Yuğarı Mäxkämäse prezident saylaularınıñ ikençe turındağı xärämläşülär turında xökem çığara. Oppozitsiä taraftarları mäxkämä binasın uratıp alğan. Russiä prezidentı Putin saylaular turındağı debatlarğa yañadan qatnaşıp, ikençe tur saylaularnı qabatlauğa qarşı buluın äytte.

Ukrainada xakimiät öçen köräş tınıç yullar belän läkin qızu bara. İl yul çatında tora. Yä Russiägä yäisä Yevropağa yaqınlaşu yulınnan baraçaq. Russiä prezodentı Putin saylaualdı kampaniäsendä aktiv qatnaştı. Här tur saylaulardan alda Ukrainağa kilep Yanukoviçnı yaqlauın açıqça kürsätte. Ukrainanıñ urnınan kitärgä tieşle prezidentı Kuçmanıñ kiçä Mäskävgä yasağan vizitı vaqıtında da Putin oppozitsiä kandidatı Yuşenkonıñ ikençe tur saylaular ütkärü taläben kire qaqtı häm Mäskäv belän Küev arasındağı yaqın mönäsäbätlärgä basım yasadı.

Audio

"İlne nığıtu häm krizistan çığu öçen öçen barlıq eşläregezne yaqlıybız. Russiä här vaqıt Ukraina belän buldı häm anıñ ildäge vazğiätne totrıqlandıru öçen tırışlıqlarına yardäm itäçäk dip ışandıram."

Russiä Dävlät Duması da prezidentqa iärep Yevropa Berlegen, Yevropada İminlek häm Xezmättäşlek Oyışmasın Ukrainanı cualışlarğa , tarqalışqa alıp baru qurqınıçı bulğan eşçänlek belän şöğellänüdä ğäyeplägän, Ukrain-Rus duslığın nığıtırğa kiräklegenä basım yasağan rezolutsiä qabul itte. Yevropa Parlamentı isä Yuşenkonıñ ikençe tur saylaular ütkärergä çaqıruın yaqladı. Xäzerge vaqıtta Ukraina, Yuğarı Mäxkämäneñ qararın kötä. Yuşenko da Yanukoviç ta mäxkämä qararın xörmät itäçäklären belderdelär. Mäxkämäneñ qararı bitaraf bulırmı-yuqmı , anısı da bilgesez. Şulay da Ukrainanıñ xoquq belgeçe Volodımer Vasılenko Yuğarı Mäxkämäneñ berençe tur saylaulardan soñğı vaq mäsälälärdäge qararlarınıñ bitaraf tügellegen kürsätkän dälil bumadı dip belderde.

Audio

"Saylaualdı kampaniäse başlanğaç, Yuğarı Mäxkämä monıñ belän bäyläneşle qayber şikayätlärne xäl qılu eşendä qatnaştı. Minem fikeremçä, mäxkämä qaraları şaqtıy obyektiv buldı."

Yuğarı Mäxkämä qararın çığarğanan soñ närsäneñ bulaçağı da bilgesez. Küev şähäre oppozitsiä kandidatı Yuşenko tarftarlarınıñ qulında dip äytergä bula. İkençe tur saylaulardan birle anda här könge demonstratsiälärdä yözär meñlägän keşe ciıldı. Barlq demonstratsiälär dä mitinglar da tınıç ütte. Läkin, Yuşenko kiçä, Kuçma belän Yanukoviçnıñ prezidentlıq postın saqlap qalu öçen militsiä köçennän faydalanuları mömkin dip kisätte.

Audio

"Xärämläşü bulmağan xäldä, alarnıñ 21-nçe noyäberdäge saylaularda ciñep çığa almağan buluların beläbez. Kuçma häm Yanukoviçnıñ töp senariolarınıñ bersendä köç qullanu küzdä totıla."

Kuçmanıñ närsä eşliäçäge bilgesez. Yuğarı Mäxkämä üzeneñ qararın iğlan itkännän soñ vazğiät bälkim ber az açıqlanır. Yuğarı Mäxkämä üzeneñ qararın iğlan itkän xäldä, bu xaqta xäbärlärebezdä tıñlıy alırsız.

Färit İdelle, Praga.
XS
SM
MD
LG