Accessibility links

Кайнар хәбәр

Tatar gäzitlärenä internet aşa yazılıp bulamı?


Gäzit- jurnallarğa yazılu tämamlanıp kilä. Tatarstannan çittä yäşäwçe millättäşlärebezgä öylärenä gäzit aldıru eşendä internet yärdämçe bula ala. Küp Tatarstan gäzitläreneñ global çeltärdä internet säxifäläre bar. «Mäğrifät» , «Tatarstan yäşläre»? «Şähri Qazan» gäzitläre internetqa kergän inde. «Söyembikä», «Tatarstan» jurnalların da global çeltärdä tabıp bula. Küptän tügel, «Şähri Çallı» digän gäzitneñ dä internet säxifäläre barlıqqa kilde. İnternetta säxifä bulu, ul äle gäzitne, jurnalnı çittän torıp uqıp bula, digän süz tügel. Qaysıber gäzitlär andıy mömkinlekne birä. Mäsälän, «Watanım Tatarstan gäzite» käğäz gäzit belän ber uq könne, mäqälälärne internetqa urnaştırıp bara. Ä menä «Tatarstan yäşläre» häm «Mäğrifät» gäzitläre başta gäzitne öygä aldıruçılarğa iñ soñğı mäğlümatlarnı tarata, annan soñ ğına, global çeltär aşa uquçılarğa da gäzit materialları belän tanışırğa mömkinlek birä. «Tatarstan yäşläre» gäzite www.tatyash.ru adresında urnaşqan, «Mäğrifät» gäziten, www.mağrifat.ru säxifäsendä taba alasız. Ber yaqtan internet aşa uqıp bulğaç, gäzitne öygä aldıru kiräkmi. Ämma gäzit xezmätläre bu yaqnı da uylağan. Säxifädä mäğlümatlar yä soñarıp çığa, yä ber-ike mäqälä belän genä tanışırğa mömkinlek birä, yä bötenläy mäğlümat bulmıyça, säxifägä yazılu kvitansiäsen genä elep quya. Mäsälän, Şähri Qazan gäziten internet säxifäse, kübesençä, gäzitne Tatarstannan çittäge tatarlarğa yazılırğa yärdäm itü öçen xezmät itä. shahrkazan.narod.ru/ säxifäsendä Rusiä töbäklärendä yäşäwçe millättäşlär 2005 yılnıñ 1nçe yartı yıllığı öçen tüläw kvitansiäsen basıştırıp ala ala. Läkin biredä bäyälär kürsätelmägän.

shahrkazan.narod.ru digän saytta, gäzitneñ yazmaların tatar xärefläre belän döres kürensen öçen tatar xäreflären uz komputergızga küçerep alu mömkinlege birelä. Ägär gäzit yazmalarında cawap yazarğa telisez ikän, şuşı internet säxifädä elektron xat adresın da taba alasız.

Soñğı waqıtta yañğırawıqlı mäqäläläre belän tanılğan «Tatarstan» jurnalınıñ da internet säxifäse bar. Anıñ adresı: www.tatar-magazine.ru Säxifädä berniçä mäqäläne häm yazılu kvitansiäsen tabıp bula.

Tatar xatın-qızları öçen basılıp kilä torğan «Söyembikä» jurnalı öçen internet säxifä yaña äyber tügel. Anıñ elek tä, jurnal turında küpmeder mäğlümat birüçe elektron bite bar ide. Baqsañ, «söyembikä» jurnalı üzeneñ internet biten yañartqan bulıp çıqtı. Ul www.suyumbike.ru adresında urnaşqan. Säxifä äle eşlänep betmägän, küpçelek büleklär buş älegä, ämma bulğan qädär mäğlümat tatar telendä birä. Biredä «Yazılu» digän bülek tä qaralğan, ämma älegä ul buş, şuña www.suyumbikä.ru saytı aşa jurnalğa yazılıp bulmıy. Sayttağı üzgäreşlärne küzätep barığız.

«Mädäni comğa» atnalığı, «Salawat küpere» gäzite häm küp sanlı başqa şähär, rayon tatar gäzitläre internet belän äle dus tügel. Ämma Çallı basmaları, bu yaqtan, başqalardan aldaraq tora. Çallıda çığuçı «Şähri Çallı» gäzite internetta, daimi yañarıp tora torğan web-bitlärneñ xucası bulıp tora. Biredä tatarça kirilça xäreflär qullanıla, säxifädäge xäreflär döres itep kürensen öçen, tatar şriftların üz kompyuterığızğa urnaştırırğa kiräk. Şähri Çallı gäziteneñ adresı www.challi.ru Biredä gäzitkä yazılu mömkinlege yuq, ämma gäzit mäğlümatların yazılmıyça da şuşı challi.ru säxifäsendä uqıp bula. Tatar ictimaği üzäklärneñ berse çığarğan «Azatlyk» gäzite dä, internetnı aktiv qullana. www.azatlyk.com adresında urnaşqan saytta gäzitneñ yazmaları belän daimi räweştä tanışıp torırğa bula. www.azatlyk.com saytında gäzitkä yazılu kvitansiäse yuq, ämma gäzitkä xäyriä yärdämen kürsätergä teläweçlär öçen isäp-xisap sannarı kürsätelgän. Global çeltärdä tağın, kompyuter qarşında ğına utırıp, gäzit yazdıru kebek xezmät tä kürsätelä. www.kazan.ru/podpiska digän urında teläsä nindi gäzitkä yazılırğa mömkin, maxsus täräzälärdä, isem, familiäne yazıp qaldırasız da, zakaz töymäsenä basasız. Läkin bu xezmät Tatarstan keşeläre öçen genä eşli.

Bikä Timerova.

XS
SM
MD
LG