Rusiä Prezidentı tarafınnan bilgelängän gubernatorlarğa eşlärgä caylıraq bularaq, şuña kürä, qaysıber töbäk citäkçeläre wazifalarınnan kitärgä mömkin, dip sanıy Tatarstan däwlät Şurası deputatı Flürä Ziyatdinova. Tatarstan häm başqa töbäklärlär äzerlägän tözätmälärneñ, Duma tarafınnan, qabul itelmäwenä ul ükeneç belderde. Deputatlar töbäk citäkçelären yañaça saylaw tärtiben demokratiägä qarşı dip sanıy, şuña, qanun ozaqqa barmas, dip ömetlänä. Qanunda, töbäk citäkçeläre Rusiä Prezidentınıñ ışanıç belderüen sorap, eş urınnan kitü turında ğariza yaza ala, dip äytelä. Bu matdägä deputattan añlatma soradıq. Flürä Ziyatdinova äytüençä, töbäk citäkçesen mäcbüri räweştä eştän azat itep bulmıy, gubernatorlar üzläre teläp wazifalarınnan kitsä genä. Tatarstan Prezidentınıñ wazifasınnan kitärgä cıyınuı turında älegä işetelmi, ämma anıñ säyäsi kinäçese, Rafail Xäkim, küptän tügel, ägär andıy mäs’älä kilep bassa, Şäymievnı yañadan bilgeläyäçäklär, dip belderülär yasağan ide. Flürä Ziyatdinova Tatarstan Prezidentı wazifasınnan kitärme, yuqmı äytä almıy, ämma yañadan bilgelänergä telägän citäkçelär küp bulır, digän fiker belän kileşä. Tatarstanğa citäkçene täqdim itkändä, Mintimer Şäymiev kebek täcribäle säyäsätçeneñ fikerenä qolaq salmıyça eşläsälär, Üzäkkä dä, respublikağa da faydası bulmas, dip sanıy Flürä xanım.
Bikä Timerova.
