Accessibility links

сишәмбе, 6 декабрь 2016, Казан вакыты 06:06

Tatarstan neft çığarunı arttıra


Bu atna başınıñ töp räsmi xäbäre bulıp Tatarstan prezidentı Mintimer Şäymiev citäkçelegendäge respublika delegatsiäseneñ Törkiägä säfäre tora. Ul Rusiä prezidentı Vladimir Putinnıñ räsmi säfäre qısalarında ütä. 6 noyäber könne Putin Törkiä prezidentı Äxmät Näcär Sezer belän oçraştı. Bu oçraşuda Mintimer Şäymiev tä buldı, dip xäbär itä Tatarstan prezidentınıñ matbuğat üzäge. Şulay uq ul törle däräcädäge başqa söyläşülärdä dä qatnaşqan. Ä menä Şäymievnıñ Törkiä xökümäte wäkilläre belän Tatneft’neñ Tupras kompaniäsen satıp alu turında söyläşüläre xaqında älegä bernindi dä mäğlümät yuq. Qayber ğäyre räsmi xäbärlärgä qarağanda, bu xaqta söyläşülär Tatarstan prezidentı säfäreneñ töp maqsatlarınıñ berse bulıp torsa da.

Ul arada Tatneft’ kompaniäse neft’ çığaru külämen arttıra bara. Ağımdağı yılnıñ ğinwar ayınnan alıp noyäbergä qädär 23 million 4 meñ tonna neft’ çığarılğan. Uzğan yılnıñ şuşı uq waqıttağı kürsätkeçläre belän çağıştırğanda bu san 2 protsentqa diärlek kübräk. Respublikada bıyıl alınğan 27 million 410 meñ tonna neft’neñ 84 protsentı Taneft’ tarafınnan çığarılğan, dip xäbär itä Novosti xäbärlär agentlığı. Respublikada älege çimalnı kübräk taba başlaw säbäple, Ukrtatnafta ukraina-tatar berläşmäse neft’ eşkärtü külämen dä arttırğan. Bilgele bulğança, anda nigezdä Tatarstanda çığarılğan neft’ eşkärtelä.

Ä menä respublikanıñ Tattexmedfarm berläşmäseneñ eşendä şaqtıy ğına citeşsezleklär tabılğan. Küptän tügel genä älege berläşmäne Tatarstanıñ Xisaplaw palatası wäkilläre tikşergän. Alar yasağan näticälärgä qarağanda, Tattexmedfarm citäkçelege bülep birelgän 34 million sum byudjet aqçaların tieşençä totmağan. Şulay uq, berläşmäne respublikada darularğa qıybat bäyälär buluda da ğäyeplilär. Bu xaqta respublikanıñ Ministrlar Kabinetı prezidiumı utırışında düşämbe könne söyläştelär. Utırışnı şuşı könnärdä genä Hindstannan qaytqan premyer-ministr Röstäm Miñnexanov alıp bardı.

Gölnaz İlgizär

XS
SM
MD
LG