Accessibility links

чәршәмбе, 7 декабрь 2016, Казан вакыты 11:54

Prezident Kuçma Ukraina oppozitsiäsen poçmaqqa teräde


Ukrainanıñ Yuğarı mäxkämäse prezident saylawlarınıñ ikençe turı näticälären ğämäldän çığarıp, alarnı qabatlaw kiräklege turında beldersä dä, ildäge säyäsi krizis äle haman da kierenke qala birä. Viktor Yuçenko üz tarafdarların, xakimiat oppozitsiä taläplären ütägängä qädär taralmasqa öndäde, prezident Kuçma isä ildä yaña säyäsi reformalar ütkärü kiräklegen alğa sörä.

Ukraina Yuğarı mäxkämäseneñ comğa kiçen qabul itkän qararı prezident saylawları säbäple kilep tuğan säyäsi kriziskä nihayät çişeleş birde digän ömetlär düşämbedä şaqtıy sürelde, xörmätle tıñlawçılar. Mäxkämä taläp itkänçä, ikençe turnı qabatlaw öçen kiräkle qanuni üzgäreşlär Ukraina parlamentında tieşle yaqlaw qazana almadı häm oppozitsiä xäzer üz tarafdarların Kievtäge bäysezlek mäydanınnan taralmasqa öndi. Yuğarı mäxkämä qararı belän poçmaqqa biklängän prezident Kuçma yağı isä atna azağında wäzğiatne tiz genä bäyäläp yañadan ayaqqa bastı häm ikençe turnı qabatlaw belän kileşsä dä, ildä prezident wäkalätlären kimetep, premyer-ministrnıqın arttıruğa yünälderelgän säyäsi reformalar kiräklegen alğa sörä başladı. Kilep tuğan krizista Kuçma ike doşmanlaşqan taraf arasında berdänber qanuni aradaşçı bulıp qaldı. Häm bu oppozitsiäne nıq borçıy, yäkşämbedä anıñ kürenekle wäkile Yuliä Timoşenko Leonid Kuçmanıñ xakimiattän tiz genä kitärgä cıyınmawı xaqında bolay dide.

Audio, Yuliä Timoşenko

"Barınnan da bigräk, Leonid Kuçmanıñ säyäsi qüwätne tınıç häm mädäniatle itep kenä birmäwenä imanım kamil häm anıñ, oppozitsiädän garantiälär alğan oçraqta da kitärgä äzer toruına ışanu bik zur xata bulır ide" di Timoşenko. İkençe turnı qabatlawğa öç atnadan da azraq waqıt qalıp bara, häm Yuçenko yözendä oppozitsiä xakimiatkä öç taläp quya. Berençedän, Kuçma xäzerge üzäk saylaw komissiäsen taratıp, bäysez wäkillärdän torğan yañasın bilgelärgä tieş. Moñardan tış oppozitsiä saylaw qanunına da üzgäreşlär kertüne, anda çittän torıp tawış birüne tıyunı taläp itä. Öçençedän, prezident Kuçma parlamentta ışanmaw belderelgän xökümätne häm anıñ premyerı Yanukoviçne eşennän alırğa tieş. Leonid Kuçma şuşı taläplärne barı tik oppozitsiä ul alğa sörgän säyäsi reformalarnı yaqlağan oçraqta ğına ütärgä äzer toruın belderä. Ul monı düşämbedä dä qabatladı.

Audio, Leonid Kuçma

"Minemçä, säyäsi reformalar täqdime oppozitsiäneñ xökümätne eşennän alu taläbenä dä cawap bula ala. Ägär dä andy niät bar ikän, konstitusiägä üzgäreşlär kertep yaña xökümätne inde şular nigezendä qora başlarğa kiräk" dip belderä Ukrainanıñ xäzerge prezidentı Leonid Kuçma. Birmingham universitetında eşläwçe Ukraina belgeçe Kataryna Wolczuk, Kuçmanıñ şuşı täqdimnäre oppozitsiäne bik qatlawlı xäldä qaldıra dip isäpli.

Audio, Kataryna Wolczuk

"Bu oppozitsiä öçen çınnan da ota almaslıq wäzğiat - ägär dä alar, prezident Kuçmanıñ xökümätne eşennän aluı aşa ikençe turnıñ ğädel, xärämläşülärsez ütüe garantiäsen ala, läkin kiläçäk prezident inde xäzergese tösle qüwätle bulmıy, yä Kuçma täqdimen kire qağıp, 21-nçe noyäbrdäge xällärneñ, yäğni saylaw aldaşularınıñ dikäbrneñ 26-sında da qabatlanuı aldında qala ala" di Ukraina oppozitsiäse aldındağı dilemma turında Kataryna Wolczuk. Ukraina konstitutsiäsendä qaralğança, Üzäk saylaw komissiäsenä wäkillärne prezident qına täqdim itä ala, soñraq komissiä parlament tarafınnan raslanırğa tieş.

Kärim Kamal
XS
SM
MD
LG