Accessibility links

якшәмбе, 11 декабрь 2016, Казан вакыты 10:59

Bötendönya tatar kongressı tatar jurnalistların cıya


Bötendönya tatar kongressı bu könnärdä qunaqlar qarşı ala. 9 dekaber könne Tatar kongressı Başqarma komitetınıñ komissiäläre utırışı uzaçaq. 10sı isä Başqarma komitetınıñ kiñäytelgän utırışı ütäçäk. Anda Tatar kongressınıñ yıllıq eşe tikşereläçäk. Utırış Qazannıñ Aq Bars mädäniät üzägendä bulır, dip xäbär ittelär bezgä kongressta. Älege çarada qatnaşırğa dip Rusiäneñ törle töbäklärennän milli oyışmalar wäkilläre dä Qazanğa kilde. Şulay uq bu yulı Tatar kongressı komissiäläreneñ yomğaq utırışına tatar matbuğat çaralarında eşläwçe jurnalistlar da çaqırılğan bulğan. Sişämbe könne alar Rusiäneñ törle töbäklärennän Qazanğa kilä dä başlağan. Tatar jurnalistların Qazanğa bu yulı nik çaqırğannar soñ? Bu xaqta Bötendönya tatar kongressı Başqarma komitetı matbuğat üzägeneñ citäkçese Gölnaz Şäyxieva söyläde. Ul, şulay uq, Qazanğa kilgän tatar mäğlümät çaraları wäkilläre qatnaşaçaq çaralar belän dä tanıştırdı.

Rusiä töbäklärendäge tatar jurnalistlarınıñ Qazanğa kilüläreneñ maqsatı – Tatar kongressı Başqarma komitetı qarşında eşläp kilüçe Massaküläm mäğlümät çaraları komissiäseneñ utırışında qatnaşu. Şulay uq, qunaqqa kilüçe jurnalistlar 8 dekaber könne Tatarstannıñ massaküläm mäğlümät çaralarınıñ eşçänlege belän tanışu öçen respublikanıñ saba rayonına baraçaq. Alar anda rayonda näşer itelüçe gäcit redaksiäsendä, aba dulqınnarı teleradiokompaniäsendä bulaçaq, şulay uq Sabanıñ üze, Şämärdän belän tanışaçaq. Pänceşämbe könne isä Qazanğa kilgän 40 jurnalist Başqarma komitetınıñ Massaküläm mäğlümät çaraları komissiäseneñ utırışında qatnaşaçaq. Küptän tügel bilgele jurnalist Näzifä Kärimovanıñ kitabı dönya kürgän ide. 9 dekaber könne Rusiä töbäklärennän kilgän tatar jurnalistları öçen Tatar kongressı binasında älege kitapnı täqdir itü uzaçaq

10 dekaber könne tatar jurnalistları da kongress Başqarma komitetınıñ yomğaqlaw cıyılışında qatnaşaçaq. Bu xaqta tulıraq itep bez sezgä kiläse tapşırularıbızda citkererbez.

Gölnaz İlgizär

XS
SM
MD
LG