Accessibility links

шимбә, 3 декабрь 2016, Казан вакыты 14:42

Ukraina oppozitsiäse prezident belän säyäsi reforma ölkäsendä urtaq fikergä kilä almıy


Kievtä sişämbegä qarşı töndä inde mäğlüm xalıqara aradaşçılar qatnaşında ütkän häm altı säğät barğan söyläşülärdä Ukraina prezidentı Leonid Kuçma oppozitsiä citäkçese Viktor Yuçenkonıñ iñ möhim taläplärennän bersen - xäzerge Üzäk saylaw komissiäsen taratu häm yañasın bilgeläw taläben ütärgä äzer toruın belderde. Ämma ul berük waqıtta oppozitsiäneñ üze täqdim itkän konstitutsion üzgäreşlärne qabul itüen dä teli.

Ukrainanıñ xakimiat elitası eçendä säyäsi säwdä haman da däwam itä - prezident Kuçma kiläçäktä däwlät başlığı wäkalätlären kimetep, xökümät wä parlament qüwäten arttırunı küz aldında totqan üzgäreşlärne alğa sörä, oppozitsiä isä 26-nçı dikäbrgä bilgelängän qabat tawış birüne yaña Üzäk saylaw komissiäse belän, häm xäzerge xökümätsez ütkärüne taläp itä. Kievtä sişämbegä qarşı töndä xalıqara aradaşçılar qatnaşında uzğan 6 säğätlek söyläşülärdän soñ Leonid Kuçma üzeneñ, Üzäk saylaw komissiäsen yañadan tözügä, alay ğına da tügel, saylaw qanunına qayber üzgäreşlär kertüne dä yaqlarğa äzer buluın belderde.

Audio, Leonid Kuçma

"Bez Ukraina prezidentın saylaw qanunına, tawış birüne açıq häm ğädel ütkärüne küz aldında totqan üzgäreşlär kertü kiräklege belän kileştek, bu törle bozularğa häm aldaşularğa kirtä quyaçaq" di Ukraina prezidentı. Şul üzgäreşlärgä, çittä tawış birüne häm öydän torıp tawış birüne beterü dä kerä. Oppozitsiä, näq menä şuşı ike ısulnı faydalanıp premyer Yanukoviç yağı Ukrainanıñ könyaq-könçığış ölkälärendä üzenä yalğan tawışlar östi aldı dip isäpli. Ä menä Yuçenko tarafdarlarınıñ öçençe taläbe - Yanukoviç xökümäten eşennän aluğa kilgändä prezident Kuçma bik aşıqmıy, häm üzeneñ moña barı tik, oppozitsiä Ukrainada säyäsi reformalar ütkärü kiräklege belän kileşkändä genä baraçağın äytä. Leonid Kuçma.

Audio, Leonid Kuçma

"Qarşılıqlar nigezdä ber yaqtan säyäsi reformalarğa häm ikençe yaqtan xökümätne eşennän aluğa qarağan ber-bersenä bäyle tawış birü mäs''äläsendä qala" di prezident Kuçma. Oppozitsiä isä şuşı ike möhim närsäne ber-bersenä bäylärgä yaramıy, üzen elekke xärämläşülär belän pıçratqan Yanukoviç xökümäte kiçekmästän urınınnan kitärgä tieş, ä menä xakimiat büleneşenä qarağan konstitutsion üzgäreşlärne qabat tawış birügä qalğan 3 atna eçendä aşıq-poşıq qabul itärgä yaramıy dip belderä. Yuçenko tarafdarları fikerençä, Leonid Kuçma monı maxsus räweştä xäzer, qabat tawış birügä qädär kütärä, çönki anda Yuçenkonıñ ciñep çığaçağın sizä häm anıñ prezident bularaq xakimiaten aldan uq çikläp quyarğa omtıla. Sişämbe köne buyı Ukraina parlamentı da ildäge şuşı säyäsi krizisnı xäl itü yulları xaqında fiker alıştı häm aña üz çişeleşen tabarğa tırıştı, läkin annan älegä nindider urtaq ber qararğa kilü xaqında xäbär alınmadı. Prezident Kuçma oppozitsiä belän ğomumi kileşügä ireşmi torıp, parlamentnıñ säyäsi protsessqa öleş kertü mömkinlege çiklängän bulıp qala. Misal öçen, Üzäk saylaw komissiäsen näq menä Yuğarı Rada raslasa da, anıñ äğzaların barı tik prezident qına täqdim itä ala.

Kärim Kamal
XS
SM
MD
LG