Accessibility links

җомга, 9 декабрь 2016, Казан вакыты 03:05

Nigä Tatarstannan çittä tatar matbuğatına yazılu qıyın yä bötenläy mömkin tügel?


Şuşı arada ğına Azatlıq radiosına Ukrainanıñ Mikolaiv şähärennän millättäşebez Şamil äfände İxsanov şaltırattı. Ul Rusiädän çittä yäşäwçelärgä tatar matbuğatına yazılıp bulmawğa zarlandı. Tatarstannan çitkä tatar matbuğat çaraların taratu mäs’äläse Ukrainada yäşäwçe Şamil İxsanov öçen genä tügel, ä başqa respublikada yäşämägän millättäşlärebez öçen dä şaqtıy aktual’ buluın istä totıp, bez aña cawapnı Azatlıq radiosı aşa birergä buldıq.

Älege sorawğa açıqlıq kertü niätennän bez respublikanıñ Tatarstan poçtası idäräsenä häm Tatarstannıñ Tatmedia agentlığına möräcäğät ittek. Annan alğan mäğlümätlärgä qarağanda, respublikada basıla torğan tatar telendäge gäcit-jurnallarğa yazılu Rusiä töbäklärendä şaqtıy äybät oyıştırılğan. Bu xaqta Tatmedia agentlığınıñ mäğlümät çaraları häm näşriät bülege citäkçese Färit Gäräev söyläde.

Rusiädä yäşäwçe millättäşlärebezgä tatar matbuğat çaralarına yazılır öçen poçta bülekçälärenä kerep, Rospeçat’ katalogın sorap alırğa kiräk. Älege katalogınıñ 486 bitendä, regional’, cirle basmalar digän bittä respublikada näşer itelüçe tatar telendäge gäcit-jurnallarnıñ indeksları kürsätelgän. Şunnan qarap, alarğa yazılırğa mömkin. Barlığı Rospeçat’ katalogına tatar telendäge 23 gäcit häm 15 jurnal kertelgän

Ä menä BDB häm Baltiq illärendä tatar matbuğatına yazılu çınlap ta mömkin tügel diärlek.

Bügenge köndä BDB illäre çiklärendä tatar telendäge barı 2 basmağa ğına yazılırğa mömkin. Alar Mädäni comğa gäcite häm Çayan jurnalı. Bu älege ike basmanıñ ğına Mäskäwdä terkälü ütüe belän añlatıla.

Monnan tış, respublika basmalarınnan BDB illärendä tarala torğan gäcit-jurnallar isemlegenä tağın ike rus telle gäcit tä kertelgän. Kürüegezçä, Tatarstanda dönya kürüçe distälägän basmalar älege katalokta yuq. Monıñ säbäblären Azatlıq radiosı tıñlawçılarına Tatarstan poçtası idäräseneñ matbuğatnı taratu bülege xezmätkäre Fäniä Fagmeeva añlattı. Fäniä Fagmeeva süzlärenä qarağanda, BDB illärendä taratıla torğan basmalar katalogına kerteler öçen bar gäcit-jurnallarğa da Mäskäwdä terkälü uzarğa kiräk. Monıñ öçen matbağalarnıñ redaksiä wäkilläre 500 sum tüläp, Mäskäwdä terkälü ütärgä tieş. Tatarstan poçtası idäräse xezmätkärläre bu taläp belän bar matbuğat çaraların tanıştırsa da, tatar basmalarınnan terkälüne barı tik Mädäni comğa gäcite häm Çayan jurnalı ğına eşlägän.

Bu oçraqta Rusiädän çittä yäşäwçe millättäşlärebezgä nişlärgä soñ? Tatar gäcit-jurnalları BDB häm Baltiq illärendä tarala torğan basmaların isemlegenä kergänçe Färit Gäräev çittäge tatarlarğa menä nindi kiñäşlär birde.

Minemçä, Rusiädän çittä yäşäwçe millättäşlärebezgä yazıp alırğa telägän matbuğat çaralarınıñ redaksiälärenä möräcäğät itärgä kiräk. Alar üzläreneñ uquçılarına hiçşiksez yärdäm itmiçä qalmas. Redaksiälär berniçä sannı bergä cıyıp, çit ildäge uquçılarına poçta aşa cibärü mömkinlegen qarıy ala.

Bu Tatmedia agentlığınıñ mäğlümät çaraları häm näşriät bülege citäkçese Färit Gäräevnı fikere ide.

Bu kiñäş tıñlawçıbız Şamil İxsanovnı qänäğätländererme, yuqmı – älegä äytep bulmıy. Läkin tatar basmaları üzläre uquçı, äbünäçelär, şul isäptän, yıraqtağı millättäşlärebez öçen dä, köräşmäsä, alarğa yıldan-yıl kimegän tirajlarnı saqlap qalu tağın da qıyınraq bulaçaq.

Gölnaz İlgizär

бәйле язмалар

XS
SM
MD
LG