Accessibility links

Кайнар хәбәр

Qazanda Qış babaylar nindi teldä söyläşä?


Sezneñ tatarça cırlağan, söylägän uyınçıqlar kürgänegez barmı? Äye, mineke dä yuq. Ğädättä balalarıbıznıñ iñ berençe dusları da rusça endäşüçe uyınçıqlar bula. Min keçkenä waqıtta söyläşä torğan qurçaqlar kürep şaqqatqan idem. Alar ber genä süz belä: mama. Ul waqıtta tatar balalarınıñ qurçaqları küz kerfeklären selketep, äni dip endäşergä mömkin digän fiker kilmägän ide. Çönki bolay da añlaşıla. Nişläp inde qurçaq tatarça söyläşsen, cırlasın, imeş. Ul bit barı tik rusça ğına söyläşä belä. Yıllar buyı şuña ışanıp yäşädek. Soñğı yıllarda bazarda qıtayda yasalğan döyälär, mikimaus digän tıçqannar kürenä başladı. Alar küñelle genä itep inglizçä cırlıylar. Rusiä bazarında satılsalar da, alar ber süz rusça belmilär. Ğäcäpme-tügelme, ä bügen bu uyınçıqlar kübräk ingliz telendä söyläşä.

Yaña yıl aldınnan kibetlärdä reklama öçen qış babaylar quyıla. Tatarlar, möselmannar yaña yılnı häm santaklausnı çit itep tanıy dip sanalsa da, barıber, yaña yıl bäyräme zurlap ütkärelä. Tatarlar da qotlaw räsemnären, otkrıtkaların tutırıp, yaqınnarına cibärä. Tatarça izge teläklär yazılğan räsemle xatnı ber genä poçtada da taba almadım. Alar bar, ämma defitsit. Qış babaynıñ tatarça söylägänen televizordan ğına işetep bula.

İnde zamana urıs telen dä tatar tele kebek xälgä qaldıra başladı. Menä niçek cırlıy Qazan kibetendäge santaklaus.

Audio

Qazan şähäreneñ Lomja uramındağı “Edel''veys” kibetendä quyılğan qış babay menä şulay inglizçä cırlıy, üze basqan cirendä diskotekalarda yäşlär biegän kebek selkengäli. Santaklausnıñ qızıl tunı da qısqarıp, zamança pinjäk räweşenä kilgän. Kibetkä kilüçelär, buyı-sını belän ğadi keşedän ayırılmağan, santaklaus yanına cıyılıp, yılmayıp, anıñ cırın tıñlıylar. Ämma ber kemdä cırnıñ süzlären yünläp añlamıy.

Şuşı uyınçıq santaklausnıñ bäyäse ille meñ sum tora ikän. “Edel''veys” kibetläre xucası İl''şat Xäyrullin säwdä reklaması öçen bu aqçanı jällämägän. Qış babay inglizçä cırlağaç, tağın da tekäräk kilep çığa. Qayber rus apaları: “Ä närsä, urısça cırlatıp bulmıy idemeni, nindi qar babay inde bu!”- dip suqransalar da, qış babaynı tuqtatırğa, anıñ yanınnan kitärgä aşıqmadılar. Şundıy fiker kilde. Ägär dä bu söykemle qurçaq tatarça cırlıy başlasa, başına tübätäy kisä, böten keşe şaqqatır ide. Bälki, Qazanda millätçelek, separatizm tämam azdı digän tawış kütäreler ide äle. Şulay da Rawil Şäräfi tawışı belän cırlawçı qış babay yäki Şamqay tawışlı Şombay yäki Bıltır Qazan uramnarında, kibetlärendä kürensä ikän dip xıyallanam. Muzıkal otkrıtka «Tuğan tel” köyen uynap açılsa häm Näwrüz bäyräme belän qotlağan süzlär belän bizälsä, niçek şäp bulır ide. Andıy närsä texnik yaqtan mömkin dilär bit.

Ä xäzergä Qazanda qış babaynıñ inglizçä häm latin xärefläre belän söyläşkänenä ber kem qarşı çıqmıy. Ul, tatarlar, qalışmağız, digän kebek küz qıssa da, anıñ süzlären añlawçı yuq.

Al''bina Zäynulla

XS
SM
MD
LG