Accessibility links

шимбә, 3 декабрь 2016, Казан вакыты 14:45

Nurulla mäçete yanında möselman kitapxanäse bulırmı?


Bu çärşämbedä köz könnärendä ayıruça aktual’ bulğan ber temağa qaytırğa säbäp buldı. Süz Qazannıñ üzägendä urnaşqan Nurulla mäçete yanındağı bina xaqında bara. İsegezgä töşerep ütik, x.t., bu bina tiräsendä cäncal 2004 yılnıñ sentäber ayında başlanıp kitte. Älege bina respublikanıñ Cir milege däwlät komitetı qararı nigezendä 1997 yılda Turan waqıfına birelgän. Läkin binada bernindi tözekländerü eşläre alıp barılmaw säbäple, 2003 yılnıñ yül ayında komitet Nurulla mäçete sorawı buyınça älege qorılmanı mäçet qaramağına tapşıra. Monda möselman kitapxanäse oyıştırılırğa tieş bula. Läkin Turan waqıfı älege binanı Qazanda eşläwçe Fon digän isemle tözeleş şirkätenä satqan. Fon Nurulla mäçete yanındağı bu cirdä säwdä üzäge tözärgä niätlägän. Alay ğına da tügel, matbuğatta törle şirkät häm kompaniälärgä yaña tözelgän üzäktä urın satıp alu mömkinlege xaqında reklama da kürenä başladı. Şuña da, älege tözeleş şirkäte iske binanı sütä dä başladı.

Läkin moña Qazannıñ möselman cämäğätçelege qarşı çıqtı. Din wäkilläre, milli cämäğätçelek Nurulla mäçete yanındağı älege binanı döres satmağannar, ul mäçetneke bulırğa tieş dip, Turan waqıfınıñ häm Fon oyışmasınıñ ğämällären döres tügel, dip mäxkämägä möräcäğät itkän. Tatarstannıñ Arbitraj mäxkämäse mäçet yanındağı binanı satu qanunsız dip tapsa da, İdelbuyı federal’ okrugınıñ arbitrajı bu qararnı kire qaqtı. Läkin milli cämäğätçelek monıñ belän genä tuqtalmadı häm Rusiäneñ Yuğarı arbitraj mäxkämäsenä möräcäğät itmäde. Şuşı könnärdä genä annan cawap kilgän. Bu xaqta Milli mäclesneñ idärä äğzäse Zöhrä Aysina menä närsälär äytte.

Bez Rusiäneñ Yuğarı arbitraj mäxkämäsenä möräcäğät itkän idek. Bu mäxkämäneñ utırışında şuşı könnärdä genä bezneñ möräcäğät qaraldı. Anda İdelbuyı arbitraj mäxkämäseneñ qararı döres tügel, digän näticä yasaldı. Bu qarar Yuğarı mäxkämäneñ prezidiumına tapşırıldı. Xäzer mäxkämägä başqalardan da ğarizalar kilmäsä, bu binanı tizdän bezgä birerlär, dip uylıym

Şulay itep, respublika möselmannarı Nurulla mäçete tiräsendäge binada möselman kitapxanäsen oyıştırırğa ömetlären özmi.

Gölnaz İlgizär

XS
SM
MD
LG