Accessibility links

җомга, 9 декабрь 2016, Казан вакыты 13:01

Sverdlov ölkäsendä un yıldan soñ berençe cır festivale ütte


Sverdlov ölkäse tatarlarınıñ mädäni tormışında bik zur ähämiätkä iä bulğan waqiğa bulıp uzdı. Soñğı un yıl eçendä berençe tapqır tatar cırın yäş başqaruçılar bäygese ütkärelde. Älege konkurs yäş buında tuğan mädäniätkä, tuğan telgä mäxäbbät tärbiäläw yözennän, yäş başqaruçılar arasında yaña isemnär tabıp, alarnı üsterü maqsatı belän Milli Media-Xolding tarafınnan oyıştırıldı. Bu başlanğıçnı Sverdlov ölkäse häm Tatarstan respublikası mädäniät ministrlıqları, bötendönya tatar kongressı başqarma komitetı xuplap qarşı aldılar häm mömkin qädär yärdäm qulın suzarğa rizalıq birdelär. Qazannan “Salawat” cır teatrı häm Salawatnıñ üze bu konkursnı oyıştıruda qatnaşırğa rizalıq birüe oyıştıruçılarğa tağın da zur kütärenke rux östäde. Şulay itep, Sverdlov ölkäsendä tatar cırın yäş başqaruçılar konkursına äzerlek şundıy citdi, kiñ qolaç aldı.

Yäş başqaruçılar konkursında ölkäneñ törle poçmaqlarınnan 10 yäştän 30 yäşkä qädär bulğan illedän artıq keşe qatnaştı. Şulay uq Çiläbe ölkäsennän kilüçelär dä bar ide. Alarnıñ çığışın bik zur wäqälätle jyuri bäyäläde. Jyurinıñ räise bulıp Tatarstannıñ xalıq artistı, Qazan däwlät mädäniät häm sänğät universitetınıñ estrada artistları kafedrası mödire, dotsent Salawat Fätxetdinov eşläde. Jyuri sostavında şulay uq Respublika fänni metodik üzägeneñ regionnar belän eşläw buyınça baş belgeçe İlgiz Kadıyrov, Tatarstannıñ atqazanğan sänğät eşleklese, kompozitor Rif Ğataullin, Qazan şähäre filarmoniäse solistkası Al''bina Kinjalieva, Tatarstannıñ atqazanğan artistı Xäydär Gıyl''fanov, xalıqara cır konkursı diplomantı Marat Qanafin, “Saf çişmä” gazetası redaktorı Miñsılu İjguzina kebek belgeçlär eşläde. Konkurs altı nominatsiä buyınça bäyälände: tatar xalıq cırın başqaruçılar, estrada cırın başqaruçılar, klassik stil''dä başqaruçılar, vokal ansambl''lär, 10 yäştän 14 yäşkä qädär bulğan balalar häm garmunçılar ayırım nominatsiälär buyınça köräştelär.

Näticädä qatnaşuçılar arasınnan törle däräcädäge diplomnarğa layıq bulğan yegerme lawreat häm un diplomant saylanıp alındı. Kiçen konkursta ciñüçelär häm qunaqlar çığışın qararğa dip Uralmaş mädäniät sarayın tutırıp xalıq cıyıldı. Ğala konsert waqıtında älege waqiğanı oyıştıruçılarğa häm tatar mädäniäten üsterügä ayıruça zur öleş kertüçelärgä Tatarstan mädäniät ministrlığı häm Tatarstan respublikası prezidentı apparatı citäkçese isemennän räxmät xatları häm büläklär tapşırıldı. Şundıy räxmät xatlarına “Kügärçen” balalar ansamble citäkçese Railä İbrahimova häm “Yäş uqıtuçılar” ansamble citäkçese Nuretdin Kamaliev layık buldılar. Uralda tatar mädäniäten üsterüdä zur öleş kertkän öçen, Tatarstannıñ atqazanğan artistı Xäydär Gıyl''fanov häm Milli Media-Xoldingnı ğämälgä quyuçılarnıñ berse, Sverdlov ölkä Zakonnar cıyılışınıñ wäkillär palatası deputatı Al''bert Abzalov Tatarstan mädäniät ministrlığınıñ maxsus büläge – kükräk bilgesenä layıq buldılar.

Xalıq çığış yasawçılarnı häm oyıştıruçılarnı köçle alqışlar belän qarşı aldı. Şulay itep, ölkä külämendäge tatar cırın yäş başqaruçılar konkursı kiñ qolaçlı, matur cır bäyrämenä äwerelde.

Küptän tügel Sverdlov ölkäse Xalıqlar icatı yortında “Tatar xalıq icatı. Zamana häm ğöref-ğadätlär” dip atalğan ğämäli seminar bulıp uzdı. Tatarstan Respublikası mädäniät ministrlığı qarşındağı Respublika fänni-metodik üzägeneñ turıdan-turı qatnaşı belän mondıy seminarlar inde berniçä yıl rättän uzdırılıp, matur ğädätkä äwerelde. Seminarnıñ ictimaği oyışmalar tarafınnan tügel, mädäniät ministrlıqlarınıñ üzara kileşüe näticäsendä xökümät külämendä uzdırıluı da bik möhim närsä. Sverdlov ölkäseneñ törle poçmaqlarınnan maxsus bu çarağa dip rayon mädäniät bülekçäläre tarafınnan cibärelgän tatar mädäniät xezmätkärläre teläsälär-telämäsälär dä rayon citäkçeläre qarşında üzläreneñ barlığın iskärtep toralar digän süz bu. Seminarğa kilüçelärneñ sanı yıldan-yıl kimemäwe tağın da quanıçlı xäl.

Respublika fänni-metodik üzägeneñ regionnar belän eşläw buyınça baş belgeçe İlgiz ağa Qadıyrovnı töbäklärdä inde küptän belälär, üz itälär, yaratıp qarşı alalar. Anıñ birgän däreslären bik birelep tıñlıylar. Şulay uq Üzäkneñ xoreografiä buyınça baş belgeçe Liliä xanım Möxämmätşina da seminarda qatnaşuçılar öçen kiñ eçtälekle däreslär birä. Ğomumän, mondıy seminarlar töbäklär öçen bik faydalı uza.

Bu könnärdä Yekaterinburg şähärendä böyek şağir Mostay Kärimgä 85 yäş tuluğa bağışlanğan zur kiçä bulıp uzdı. Kiçäne oyıştıruda Başqortstan Respublikasınıñ Sverdlov ölkäsendäge daimi wäkile Näfisä Tyumenseva, Sverdlov ölkä başqort milli-mädäni avtonomiäse citäkçese Söfxät Nadıyrov zur köç quydılar. Başqortstannıñ xalıq artistı Ğäli Xämzin citäkçelegendä zur icat törkeme dä kilgän ide. Kiçädä ädipneñ şiğerläre uqıldı, başqort xalqı küñele xäzinäläre bulıp ozın xalıq köyläre, quray moñı yañğıradı. Böyek şağirneñ 85 yıllığına bağışlanğan kiçä kütärenke icat ruxında ütte.

Fäwiä Safiullina. Yekaterinburg.

XS
SM
MD
LG