Accessibility links

җомга, 9 декабрь 2016, Казан вакыты 03:07

Ufa Rusiädä töbäklärne quşıp zuraytu bezneñ respublikağa qağılırğa tieş tügel di


Başqortstan xakímítlarınıñ mäğlümati ruporı bulğan «Başinform» agentlığında Rusiä töbäklären erelätügä qağılışlı mäsälälärne qarağan wideo – press – konferensí bulıp ütte. «Açıq Rusiä» isemle ictmağí oyışma bulışlığı belän oyıştırılğan älege söyläşüdä Mäskäwdän Sosíal säyäsät bäysez institutı töbäk programı direktorı Natälyä Zubarewiç ta qatnaştı häm jurnalistlarnıñ küp sanlı sorawlarına cawaplar birde.

Natälyä Zubarewiçnıñ fikerlärennän şul añlaşıla: Rusiädä töbäklärne erelätü omtılışları iñ täwdä töptän uylanırğa tieş. Alaysa Wiktor Çernomırdin äytkänçä kilep çığuı bar, yägni «yaxşıraq buluın telägän idek tä, tik, härwaqıttağıça, kilep çıqtı» dip äytergä turı kilüe bar. Natälyä Zubarewiç äytüençä, töbäklärne erelätü ideyäse Rusiädä çirattağı ber qaraçqı kebek faydalanıla. Bu ideyäne tormışqa aşırunıñ citdi eşlängän ber genä programı da yuq älegä. Ä şul uq waqıtta ildäge kiñ bilgele säyäsätçelär awızınnan bu täqdimnär könnän – kön yışraq yañğırí. Älbättä, qayber waq töbäklärne bergä quşu, bälki, fayda da birergä mömkin. Ämma milli republíklarnı, bigräk tä Tönyaq Qawqaz töbäklären bergä quşarğa mataşularnıñ nindi näticälärgä kiteräçägen küz aldına kiterüe dä qurqınıç.

Başqortstanda da soñğı waqıtlarda töbäklärne erelätü niätläre xaqında matbuğatta eş qına süz quzğatıla, bilgele säyäsätçelärneñ, deputatlarnıñ fikerlären beleşü oyıştırıla. Älege temğa üz qaraşların belderüçelärneñ zur küpçelege Başqortstannı nindi dä bulsa kürşe töbäk belän quşıp quyuğa kisken qarşı buluın belderä. Başqortstan Däwlät Cíılışı – Qorıltaynıñ daimi qömitetı räise Zöfär Yenikeyev ta näq şundílar isäbennän. – Ğomumän alğanda, min Rusiä töbäklären erelätü ideyäsen xuplím, – di Zöfär äfände. – Läkin Başqortstan belän Tatarstan kebek üz könnären üzläre kürüçe quätle milli republíklar üzallı yäşäp qalırğa tieş. Moñardan Rusiä üze dä otaçaq qına.

(Yenikeyev) Sez Başqortstan Däwlät Cíılışı – Qorıltay deputatı, andağı daimi qömitet räise Zöfär Yenikeyev fikerlären işettegez. «Milli republíklarğa da erelätü ideyäsen tağarğa mataşu qurqınıç näicälärgä kiterergä mömkin, – dip belderä Zöfär äfände. – Bezneñ tatar belän başqort moña hiç kenä dä riza bulmayaçaq häm motlaq qarşılıq çaralarına kereşäçäk. Ä bu kierenkelek Rusiägä kiräkme ikän?».

XS
SM
MD
LG