Accessibility links

җомга, 9 декабрь 2016, Казан вакыты 10:48

Ğiraq şiğiläre 30 ğinwar saylawları aldınnan berdäm koalitsiä tözüen belderde


Ğiraqnıñ şiği citäkçeläre 30 ğinwarda ütäçäk saylawlarğa 228 namzättän torğan koalitsiä tözüen iğlan itte. Ğiraqnıñ Berläşkän Alyansı dip atalğan yaña oyışmanı şiğilärneñ ruxanie Ayatolla Ali Äl-Sistani xuplıy. Däwa partiäse räsmie Ali Äl-Ädip süzlärençä, yaña oyışmağa şiğilärneñ 3 ere firqäse, şiği kördlär törkeme, Yazidis isemle dini azçılıq törkeme häm törkmännär xäräkäte kerä. Şul isäptän, töp sönni xäräkätkä quşılmağan bäysez sönnilär dä bar. Quşma Ştatlarğa qarşı Moqtada Äs-Sadr xätäkäte saylaw komissiäsendä terkälmäw säbäple oyışmağa kertelmägän. 30 ğinwarda ütäçäk saylawlarda ğiraqlılar 275 keşedän torğan Milli Mäcles saylarğa tieş. Bu Mäcles ilneñ yaña xökümäten häm yaña konstitutsiäne yazaçaq törkem bilgelärgä tieş bulaçaq.

Ul arada Ğiraq räsmiläre äytüençä, bügen Bagdadta, İtalia ilçelegenä töbälgän höcüm näticäsendä kimendä 2 ğiraqlı hälaq bulğan, berniçäse yaralanğan. Tönyaqtağı Mosulda amerikan qärwanına taba yünälgän bombalı maşina şartlaw näticäsendä berniçä ğiraqlı yaralanğan.

Bügen Yaponiä xökümäte Ğiraqtağı xärbilären tağın ber yılğa qaldırırğa digän qarar qabul itte. Könyaq Ğiraqta Yaponiäneñ 550läp xärbie bar. Alar xärbi bäreleşlärdä qatnaşmıy, su tazartu häm tözekländerü eşläre belän mäşğül.

XS
SM
MD
LG