Accessibility links

дүшәмбе, 5 декабрь 2016, Казан вакыты 11:37

Cır häm biü ansamble Internetqa çıqtı


Bu atna, Tatar internet dönyasına ike yañalıq alıp kilde. Tatarstannıñ cır häm biü ansambleneñ internetta saytı açıldı. Häm «Tatar-inform» agentlığı saytın üzgärtep, yaña internet säxifäsen açırğa cıyunı turında bilgele buldı. «Tatar –inform»nıñ inde moña qädär dä internetta üz saytı bar ide. Agentlıqnıñ xäzergä räsmi säxifäse www.tatinfo.ru adresında urnaşqan. Ä www.tatar-inform.ru adresındağı säxifä äle räsmi räweştä açılmağan. Ul tulılanıp qına bara. Bezneñ xäzer uq, saytnıñ adresın tabıp, üzgärep barğan säxifäne kürergä mömkinlegebez tudı. «Tatar-inform» agentlığınıñ saytı bizäleşen üzgärtkän, anda töp 2 yañalıq räsemnär belän bireläçäk, köndälek xäbärlär dä şuşında basılıp baraçaq. Läkin yañalıqlar tuplanmasınıñ tulı variantı belän tanışıp barır öçen, «Tatar-inform»ğa yazılırğa turı kiler.

Ä menä Tatar cır häm biü ansableneñ saytı inde açıldı. Şuşı könnärdä ul global çeltärdäge dusların däşte. Adresı ğadi www.tatans.com .

Ansambleneñ baş administratorı Gölnaz Bädretdinova äytkänçä, sayt 3 teldä eşlängän, anda xezmätkärlär, çığış yasaw waqıtları, elemtägä kerer öçen elektron poçta adresları kebek mäğlümat urın alğan. Säxifädä mp3 formatındağı cırlarnı d atabıp bula. Mäsälän anda «Ay bılbılım», «Sornay», «Fazil çişmäse» häm başqa köylär urnaştırılğan. Video faillar öçen bülek äzerläp quyılğan, yaqın arada, ul da tulılanırğa tieş.

Ägär sez internetta üz säxifäsen zur şirkätlär genä, bay keşelär genä yasıy ala, dip uylasağız, yalğışasız. Monı här kem buldıra ala. Rusiädä iñ populär saytlarnıñ berse, www.narod.ru, şäxsi säxifä yasarğa birä. Sayt öçen äzer formalar birelä, anda mäğlümat urnaştıru tärtibe ğadi tel belän añlatıla. Häm barısı da buşlay. Näticädä sezneñ saytığız www.sezneñisem.narod.ru bulaçaq.

www.narod.ru oşamasa, başqa resurslarğa da iğtibar itärgä bula. Mäsälän, www.kazan.ws digän Tatarstan serverı da, şäxsi säxifägezne yasaw öçen urın häm adres birä. Anda da äzer forma bar, yañalıqlar, qunaq kitabı, berençe bit kebek büleklär inde äzer kileş täqdim itelä. Häm şulay uq, barısı da buşlay. Sezneñ säxifäneñ adresı bu oçraqta, üzegez saylağan isem häm kazan.ws bulaçaq. Mäsälän, «Tatnet» tapşırunıñ saytın www.tatnet.kazan.ws dip atarğa mömkin bulır ide.

Älegä «Tatnet» tapşırunıñ tekstları belän www.azatlıq.org ta tanışa alasız.

Bikä Timerova.

XS
SM
MD
LG