Accessibility links

пәнҗешәмбе, 8 декабрь 2016, Казан вакыты 03:14

2004 yılnıñ Nobel büläkläre tapşırıldı


Bügen Norvegiä başqalasında 2004 yılnıñ Nobel tınıçlıq bülägen tapşıru tantanası ütte. Büläkkä iä bulğan Kenya möxit saqlawçısı Wangari Maathai tantanada çığış yasap, "möxit saqlaw – demokratiä häm tınıçlıqqa ireşü öçen ğayät däräcädä möxim ğämäl" dide:

Audio (Wangari Maathai): "Ezlekle täräqqiät, demokratiä häm tınıçlıq ber-bersennän ayırılğısız äyberlär, bezgä monı añlarğa waqıt."

Afrikada 30 million ağaç utırtıp çıqqan "Yäşel bilbaw" isemle xäräkätkä nigez saluçı 64 yäşlek Maathai xanım xäzerge waqıtta Kenyanıñ Möxit saqlaw ministrı urınbasarı. Ber million euro aqçalata büläkkä östäp aña Nobel diplomı häm altın medal tapşırıldı.

Bügen Stockholmda ütkän ikençe tantanada Şvetsiä patşası Karl Gustaf 2004 yılnıñ meditsina, fizika, ximiä häm iqtisad ölkäsendä büläklären tapşırdı. Ädäbiät ölkäsendäge büläkkä iä bulğan Elfriede Jelinek, sälämätlege säbäple, Stockholmğa kilä almadı.

XS
SM
MD
LG