Accessibility links

Кайнар хәбәр

Aq Yort Ğiraqtağı AQŞ xärbiläreneñ xärbi cihazlar qıtlığına beterergä wäğdä itä


Comğa könne Aq Yort süzçese Scott McClellan jurnalistlarğa bolay dip belderde.

AUDİO: Prezident bezneñ ğäskärlär üz eşlärendä iñ yaxşı cihazlarğa häm kiräk bulğan barlıq resurslarğa iä bulsın öçen tırışa. Häm ul şunı kötä. Ägär dä bezneñ ğäskärlär östämä resurslarğa yäki cihazlarğa möxtac ikän, bez alarnı ul cihazlar häm ul resurlar belän tä''min itü öçen eşliäçäkbez.

Aq Yortnıñ bu belderüe AQŞ saqlanu ministrı Donald Rumsfeldnıñ çärşämbe könne Küwäyttä AQŞ xärbiläre belän ütkärgän oçraşuına cawap buldı. Xärbilär cihazlarnıñ iskergän buluına, xezmät möddätläreneñ mäcbüri ozaytıluına zarlandı. Häm belgeç Thomas Wilsonnıñ Rumsfeldqa bu turıdağı möräcäğäte xuplaw tawışları belän nığıtıldı.

AUDIO: Nigä bez soldatlar maşinalarnı nığıtu öçen cirle çüpleklärdän metallalom häm pıyala qaldıqlar cıyıp yörergä tieş, nigä bezgä ul resurslar äzer kileş birelmi.

Rumsfeldnıñ cawabı mondıy buldı:

AUDIO: Bu aqça mäs''äläse tügel. Bu telänelgän qorallar mäs''äläse dä tügel. Bu citeşterü häm häm yasıy alu mömkinlegenä bäyle. Belüegezgä suğışqa sez üzegezedä bulğan qorallar belän kerdegez, ä telägän qorallar yäki soñraq teliäçäk qorallar belän tügel.

Xärbilärne bu mäs''älä küptännän borçığan bulsa da, alar moñarçı bu qädär qatı tawış kütärmi häm Saqlanu Ministrlığı belän turıdan-turı mondıy qarşılıqqa bik kermi ide. Xäbärçelär äytüençä, bu oçraq Yaqın Könçığıştağı AQŞ xärbiläre arasında arta baruçı rizasızlıqnı kürsätä torğan soñğı insidentlarnıñ berse. Rumsfeldnıñ bu oçraşuına qädär 2 kön elek kenä Küwäyttäge häm Ğiraqtağı 8 amerikan soldatı üz xezmät möddätläreneñ mäcbüri räweştä ozaytıluına rizasızlıq belderep mäxkamägä möräcäğät itte. Üktäber ayında isä Bağdad yanında 19 armiä reservistı nığıtılmağan maşinalarda yorü artıq qurqınıç bulğanğa kürä rul''gä utırudan baş tartqan ide

Naif Aqmal, Praga.
XS
SM
MD
LG