Accessibility links

шимбә, 3 декабрь 2016, Казан вакыты 22:54

Milli kapital tudıruçı forum


Şuşı könnärdä Qazanda respublikanıñ Rossiädäge häm yaqın çit illärdäge säwdä wäkilläre cıyıldı. “Tatarstannıñ eşlekle partnerları” forumı Qazanda inde bişençe tapqır ütkärelä. Aq Bars mädäni-sport kompleksında ütkän bu cıyılışnı premyer ministr Röstäm Miñnexanov alıp bardı. Şulay uq, anda respublikanıñ säwdä ministrı Xafiz Salixov, tatar kongressı räise Rinat Zakirov, Mäskäwdäge “Berlek” dip atalğan käsep häm mädäniät oyışması citäkçese Räşit Näwretdinov, Tatarstannıñ Başqortstandağı säwdä wäkile Ramil Bignov häm başqa töbäklärdäge säwdä-iqtisad belgeçläre, eşmäkärlär, zur citäkçelär, barlığı biş yözgä yaqın keşe kilgän ide.
Tatarstannıñ çittä yäşäwçe millättäşlärgä yärdäm itüe, andağı tatarlarnıñ, üz çiratında, Tatarstannıñ tovarların elekke soyuzdaş respublikalarında satu - forumnıñ prinsibı. Şuşındıy xezmättäşlek turında forumda Tatarstan premyer ministrı Röstäm Miñnexanov söyläde. Säwdä ministrı Xafiz Salixov xäbär itkänçä, bügenge köndä Tatarstannan çittä 23 wäkilçelek häm 41 säwdä yortı eşläp kilä. Uzğan yıl näticälärenä qarağanda Tatarstannıñ töbäk-ara äyläneşe 30 protsentqa artıp, 94,5 milliard sumnı täşkil itkän. Häm şuşı äyläneşneñ yartısı Mäskäw, Sverdlaw, Samara ölkäläre häm Başqortstanğa turı kilä. Şulay uq ministr başqa töbäklärdä dä käsep eşlären uñışlı alıp barılsın ide digän telägen belderde. Çönki uñışlı käsep tatarlarnı Tatarstan belän genä tügel, ä töbäklärdäge tatarlarnı, alarnıñ oyışmaların da berläşterä. Federal' tatar avtonomiäse räistäşe Färit Urazaev äytüençä, bügen säwdä eşlärendä yaña yullar ezläw belän dä şöğellänergä kiräk, bu yünäleştä eşne alıp baru öçen tögäl ideologiä häm däwlät programması bulırğa tieş.
Tatar kongressı räise Rinat Zakirov äytüençä, sibelgän millättäşlärebez Tatarstannıñ säwdä eşçänlegendä qatnaşırğa härwaqıtta äzer. İvanovo tatarları, mäsälän, Tatarstan belän inde ber niçä yıl xezmättäşlek itälär. Bu turıda Azatlıq radiosına İvanovo şähäreneñ tatar avtonomiäse citäkçese, andağı “Tatarstan” säwdä yortınıñ direktorı Färit Läpin söyläde. Färit äfände äytüençä, Tatarstannıñ iqtisat potensialı başqa töbäklär öçen bik kiräk. Häm İvanovo şähäreneñ liderı Qazanda ütkärelgän forumnıñ faydasın toyuın da äytte.
Xäräkättä bäräkät di tatar xalqı. Xäräkät digändä säwdä, xezmättäşlekne küzallıylar. Çınlap ta millät üseşe säwdäsez, aqçasız häm milli baylarsız bara almıy. Menä mondıy forumnar Tatarstannıñ iqtisatın üsterergä, milli kapital barlıqqa kiterergä yärdäm itä.
Al'bina Zäynulla.

XS
SM
MD
LG